Hmasawnna hnathawh tur enfiah

Minister of state TJ Lalnuntluanga, Champhai South bialtu MLA chuan February 16, Inrinni khan Champhai khawpui leh a chhehvel khuate awlsam zawka tlawhpawhna tur kawngpui, Champhai Ring Road siam dan tur te, dumping ground leh Champhai Ruantlang kawngpui kama truck terminal sak turte a hmunah kalin a enfiah.

TJ Lalnuntluanga chuan, Champhai Ring Road leh truck terminal sak tur chu sorkarin a ngaih pawimawh thu leh tihfel ngaite zawh a nih veleh hna ṭan nghal tum a nih thu a sawi a, "Champhai Zotlang bula dumping ground hmun tura ruahman chhin tawh chu mipui tana him tâwk lo leh khawpui ṭhang zel tur ngaihtuah chung zela ennawn leh ni se," a ti.

Sorkar thuchhuah tarlan danin, UDPA kaltlanga Champhai Ring Road hmalakna hnuaia pakhat Tlangsam aṭanga Zotlang pawhtu kawng chei ṭhatna turin cheng nuai 240 a awm. Minister ho hian kawngpui kilometre 4.3-a thui siam dan turte leh kawngpui ṭha tak siam anih theihna tura hmalak dan turte sorkar official leh khawtlang hruaitute nen enfiah nghal a ni.

Champhai South Bialtu MLA hian Inrinni vêk khan a bial chhunga inkalpawhna kawng chhe zualpuite fûrpui hma ngeia siam a nih theih dan tur PWD executive engineer Vanlaldika chu Circuit House-ah a sawipui bawk.