CAB donaa hmalak dan thlir let

NGO Coordination Committee (Joint NGO) leh Mizoram Kohhran Hruaitute Committee (MKHC) hruaitute leh Rajya Sabha MP Ronald Sapa Tlau te chu February 15, 2019 tlai khan Aijal Club-ah an inkâwm a, Citizenship (Amendment) Bill, 2016 (CAB) donaa hmalak dan an thlir let a; zanriah an kîlho nghal.

Inkawmhona hi Jouint NGO chairman Vanlalruata'n a kaihhruai a; CAB dodalnaa hmalakna hrang hrangah Mizo mipui thawhhona leh ṭanrualna chu ropui a tih thu sawiin, Mizoram mipui chungah lawmthu a sawi.

Joint NGO secretary leh CYMA general secretary Lalhmachhuana'n Joint NGO hmalak tawh dante a sawi a; Joint NGO chuan chet dan leh hmalak dan tur an hriat ang zawng zawng hmangin CAB pass tum a ni tih an hriat tirh aṭanga an dodal thu a sawi a ni.

Rajya Sabha MP Ronald Sapa Tlau chuan, CAB pass a nih tak loh chungchangah, Mizoram leh Mizote'n an dodalnaah thangṭhat la bik tur an awm lo tih sawiin, "Bill pass a nih lohna tur atana hmalakna, a hnûn vuantu NGO te, kohhran hotute leh a bik takin kohhran ṭawngṭaina avang a ni a, Mizo mipui zawng zawng, kan zavaia tan hnehna a ni," a ti.

Thlirletna hunah hian MKHC aṭangin vice chairman Rev.Dr K Lalrinthanga, secretary Rev. R Lalrinsanga, joint secretary B Thangtinliana leh treasurer Lt.Col. Lalbulliana te an tel a; Central YMA aṭangin president Vanlalruata, vice president R Lalngheta, general secretary Lalhmachhuana, treasurer Lalrochuanga Pachuau leh finance secretary Fabian Lalfakawma te an tel.

MZP aṭangin president B Vanlaltana, treasurer Michael Lalramsanga leh finance secretary Andrew F Lalramnghaka te an tel a; MSU aṭangin vice president Lalmuanzuala, general secretary Samuel Zoramthanpuia leh finance secretary Lalramhluna te an tel bawk.