Sipai thuthang belhchian dawl lo

Tun hnaia social media thu lêngvâk, Assam Regiment sipai ṭhahnem tak Mizoramah an rawn lut a, Mizoram chhim lamah Assam Rifles sipaite nen operation an nei nia sawi ṭhin chu Lawngtlai SP Amit Goel chuan DIG (Southern Range) hnenah a sawifiah a, thu dik lo a nih thu a tarlang.

Lawngtlai SP chuan, "Thu lêngvâk hi chhui chian a ni a, Assam Rifles senior officer hnen aṭangin Mizoram chhim lamah Assam Regiment sipai an awm loh thu dawn a ni a, tunlai hian Assam Rifles-a 1st. Battalion, 10th. Battalion leh 46th. Battalion sipaite'n an tih ṭhin pangngai angin joint training exercise an nei mek zawk a ni," a ti.

Mizoram chhim lam, Lawngtlai district hnaih Myanmar ramri bul velah Myanmar sipai leh Arakan Army (hel)-te tun hnaiah an inkâp nasa tih thu a darh a; mahse, Myanmar sipai leh helho inkah nasat thu leh Mizoram (India) lam tan thil hlauhthawnawm a awm thu an hriat loh thu, Lawngtlai aṭanga thu dawnna chuan a sawi bawk.