AMC councillor-a thlan tharte March 1-ah lak luh a ni dawn

Aizawl Municipal Corporation (AMC) councillor atana thlan tharte chu March 1, 2021 khian councillor atan lâk luh a ni dawn. UDPA changtu deputy chief minister Tawnluia chuan, councillor tharte la lut turin state sorkar a inpeih tawh tih a sawi.

Vanglaini palai zawh­na chhangin Tawnluia chuan, AMC councillor tharte lâk luh hun tur chu AMC lam kut a nih thu a sawi a, "State sorkar chu a inpeih tawh. Lâk luh an nih hunah mayor, deputy mayor leh executive councillor-te'n an office an luah nghal ang a, AMC sorkar kaihhruai hna pawh an kutah a awm nghal ang," a ti.

Deputy Chief Minister sawi danin, AMC inthlan neih zawh tâka thlan tlinte chu thlan tlin an nih thu February 19, 2021 khan government gazetted-ah chhuah a ni a, chuta ṭanga chhiara ni 30 chhungin sorkar din tur a ni.

Vanglaini palai zawh­na chhangin AMC commissioner leh admi­nistrator K Lalding­liana chuan, AMC councillor tharte chu March 1, 2021 chawhnu dar 1-ah lâk luh a nih dawn thu a sawi.

AMC sorkar liam ta kha December 10, 2020-ah an term a tawp a, Mizoram sorkar chuan an term pawtsei loin, sorkar thar a pian hmaa AMC enkawltu turin AMC commissioner ni lai K Laldingliana chu administrator atan a ruat a ni.