UPC (NEI) kohhran din champha hmang

Nimin February 18 kha UPC (North East India) kohhran din champha a ni a; kum dang angin hman theih ni lo mah se, a theih ang angin an hmang a, UPC pisa, zirna-in, lehkhabu dawr, Bible college leh kohhran hmun pawimawh dangte khâr a ni.

UPC (NEI) kohhran din champha pual hian tualchhung kohhran eng emaw zat chuan nimin khan zing ṭawngṭai leh ṭawngṭai inkhawm an buatsaih. General superintendent Rev. R Lalrinsanga chuan, kohhran mite chibai a bûk a, chanchin ṭha avanga hrehawm tuartute hre reng chunga anmahni zahna leh ngaihhlutna nen chhel taka Krista hnung zui turin a fuih.

India hmarchhaka Pentecost kohhran dintu Rev. Ellis Luther Scism chu kum 1948-ah India ram a lut a, February 18, 1950 (Inrinni)-ah Aizawl thlengin, UPC kohhran an din chho ta a; Mizorama UPC kohhrana baptisma chang hmasa ber leh pastor atana lak hmasak ber chu Zakamlova a ni.

Kum 2020-a UPC General Conference report-a a lan danin, UPC (NEI) huam chhungah district 13 awmin, kohhran member 1,10,165 an awm a; tualchhung kohhran 879 leh preaching point 151 a awm bawk.