Central Jail-a táng zinga Pathian thu Zir zote thlahna Chama’n a hmanpui

Home minister Lalchamliana chuan nimin khan Central Jail-a tángte tana Set Free Ministries (SFM)-in Pathian thu zirna course vawi thumna an buatsaiha zir zote thlahna, Graduation Day a hmanpui a, zirlaite hnenah certificate a hlàn.

Lalchamliana chuan, SFM-in lung-in tángte tana Pathian thu zirtirna an buatsaih chu ropui a tih thu sawiin, “Mimal duhthusamah chuan lung-inte ruak vek se la, táng awm lo se tih hi a ni a, mihring rilruah sualin rawng a bàwl avang te, dan hriat loh avangtein lung-inah mikhual tur an awm fo ṭhin a ni,” a ti a; dan ṭha taka zawm a pawimawh thu a sawi.

Lung-in tángte’n an tàn chhunga thiam thil an zir chhuahna tur sorkarin a ngaih pawimawh thu sawiin Minister chuan, “Sofa siam, cement mistiri hna zirna leh a dangte a kalpui mek a, electric wiring leh aluminium chokut leh tukverh siam zirna pawh MYC nen ṭang dunin buatsaih vat tum a ni,” a ti.

Home Minister chuan, lung-ina táng mekte chu hrehawm leh zahthlak thila ngai lo a, Pathian thu nen mahni insiamṭhat nana hmang turin a chah a, “Rilru thar siam a, tum thar nei a, in chhuah hunah nun kawng pangngai zawh turin inbuatsaih ang che u,” tiin a fuih.

Central Jail-ah hian táng mipa 562 leh hmeichhia 42, an vaiin mi 604 an awm mek a, Set Free Ministries buatsaih Bible zirna hi kum 2018-ah Central Jail-ah hian ṭan niin, táng zinga mi 159-in an zir a, an pass vek a ni.