Mizoram Engineering College hawng

Mizoram Engineering College, Lunglei Pukpuia din thar chu nimin khan Jammu & Kashmir aṭangin prime minister Narendra Modi-a'n India ram hmun danga professional college 10 leh higher education institute hnuaia project 136-te nen a rualin a hawng.

Project hrang hrang hawn pual hian Mizoramah pawh Secretariat conference hall-ah Higher & Technical Education minister Dr R Lalthangliana hoin hun hman tur a ni a, mahse, hun tiama hawn a nih loh avangin, hawn a nih laiin minister Dr R Lalthangliana chu a awm lo.

Prime Minister hian project hrang hrangte hi chawhnu dar 2:55 a hawng dawn tih a nih avangin HTE Minister leh official dangte chuan chawhnu dar 2:30 velah Secretariat conference hall an thleng a ni. Project hawn hun tur hi ṭum eng emaw zat thlak a nih hnuah, tlai dar 4 velah Dr R Lalthangliana chuan conference hall a chhuahsan a, Prime Minister chuan tlai dar 4:30 velah project a hawng chauh a ni.

Mizoram Engineering College hi cheng vbc. 26 sênga sak a ni a, building hrang hrang - administrative block, academic block, laboratory, library, cafetaria, student common room, boys hostel leh girls hostel-te sak zawh a ni tawh a, zirlai 300 vel awm thei tura ruahman a ni.

Temporary class hawn hmain state sorkarin a panna kawng km. 3-a thui blacktop te, tui connection pek leh tui dahkhawlna siamte leh, electric pawh leh transformer bunte a la hmabak a ni.