MCON-in NAAC Grade B a hmu thar

Mizoram College of Nursing (MCON) chu National Assessment and Accreditation Council (NAAC) chuan February 15, 2021 khan NAAC accreditation grade-B (2.39) a pe a; India hmarchhak biala nursing college mal din zinga NAAC accreditation grade-B hmu hmasa ber a ni.

NAAC accreditation pek hma hian NAAC Peer Team chuan February 11-12, 2021 khan MCON hi an enfiah a, institution hmunhmate chipchiar taka an en bakah, zirna kalpui dan leh a kaihhnawih thil chi hrang hrang an zawtfiah a ni.

Sorkar thuchhuah tarlan danin, MCON hi kum 1980-ah Aizawl Civil Hospital-ah nursing school anga din niin, General Nursing and Midwifery (GNM) zirnaa bul ṭan a ni a, kum 2005-ah college-ah hlankai niin, B.Sc (Nursing) zirna hawn a ni.

MCON hi Indian Nursing Council (INC)-ah inziak lutin, Mizoram University (MZU) hnuaiah kum ruk chhung temporary affiliation-a a awm hnuah permanent affiliation pek an ni tawh a; December 2015 khan UGC 2(f) & 12(B) status pek a ni bawk.

MCON-ah hian B.Sc. (Nursing) batch khatah zirlai 30 zel lâk a ni ṭhin a, mi 349 inzir chhuak tawhin, zirlai 117 an awm mek a ni.