MICSAS-in coaching an kaltir turte an thlah

Mizo Civil Service Aspirants’ Society (MICSAS) chuan Mizo pahnih, Delhi-a central service coaching senso an tumsak tura an thlan chhuahte chu February 12, 2021 khan thlahna leh fuihna inkhawm an neihpui.

Inkhawm hi MICSAS chairman Prof. Zaithanzauva Pachuau-in a kaihruai a, secretary Dr KC Lalmalsawmzauva kaihhruaiin thuthlung an ziak a; assistant secretary Lalmalsawma Khiangte-in fuihna thu a sawi.

MICSAS-in zirlai an puih turte chu Christy Zoliansangi d/o Zohmingliana (L) Chhinga Veng leh NT Nicky Beihropha s/o NT Beiluakhu, Chhawlo, Siaha district-te an ni. An pahnih hian MICSAS chuan February 2021 chhungin Delhi-a thawn thlâk an tum a; sum an thawh khawm hmangin an kalna leh zirna sensote an tumsak vek dawn a ni.

Zirlai pahnihte chu MICSAS chuan UPSC exam vawi thum an hmachhawn thlengin coaching senso an tumsak dawn a, chumi chhung chuan hna dang zawng lo turin zirlai pahnihte chu an intiam a ni.

MICSAS chuan, Mizo ṭhalaite central service-ah an luh theih nan coaching an kalna senso tumsak turin sum an thawh khawm tih an sawi a; mi dangte tan pawh sum thawh theih a ni a, an Chairman phone no. 9862770341 leh General Secretary phone no. 9436744744-ahte biak theih an nih thu an tarlang.