Eiruk thubuaiah DMR Director leh Thawktu dang 3-in thiam loh chang

Disaster Management & Rehabili­tation (DMR) department aṭanga silpauline bill lem hmanga Rs. 35,85,000 lâk chhuah thubuaiah DMR director ṭhin PC Lalthlamuana leh department-a thawktu dang mi pathum chu thiam loh chantir an ni.

DMR department aṭanga silpauline bill lem hmanga Rs. 35,85,000 lâk chhuah thubuaiah hian Aizawl District Court-a Special Court (Prevention of Corruption Act) judge R Vanlalenmawia chuan nimin khan thutlukna siamin, mi palite chu thiam loh a chantir a; anmahni hremna tur erawh chu February 15, Thawhṭanniah a puang ang.

Judgement order-a a lan danin, Zarkawt veng mi mipa pakhatin June 23, 2006 aṭanga July 3, 2006 chhungin DMR department-ah silpauline bill lem hmangin Rs. 35,85,000 a la chhuaka hriat a ni a, February 27, 2013-ah Anti Corruption Bureau (ACB)-ah complaint thehluh a ni. ACB chuan September 9, 2014-ah chargesheet an thehlut. 

Thubuai kaihhnawih­ah hian khatih laia DMR director PC Lalthlamuana, cashier C Vanlalsawma, LDC R Vanlalhmuaka leh supplier Thanzami Tochhawng-te man an ni a; a hnuah cashier Lal­hming­liani leh store in-charge Lalramthara te man leh niin, May 31, 2006-ah supplementary charge­sheet thehluh leh a ni bawk.

He thubuaiah hian Court chuan nimin khan thutlukna siamin, R Vanlalhmuaka leh Lalhmingliani te chu IPC 120B, 420, 468 leh 471 leh, PC Act, 1988 Section 13(1)(d) hmangin thiam loh a chantir a; DMR director ṭhin PC Lalthlamuana chu IPC 120B, 420, 468 leh 471 leh, PC Act, 1988 Section 13(1)(c) hmang leh Thanzami Tochhawng chu IPC 120B, 420, 468 leh 471 hmangin thiam loh chantir an ni bawk.

C Vanlalsawma chu thu­buai ngaihtuah laia a thih avangin a thubuai tih­tawp a ni a; Lalramthara chu thiam chantir a ni thung.

Court-in thiam loh a chantirte hi dan hlui angin kum khat aia tlem lo tantir leh pawisa chawitir theih an ni a; kum sarih thleng tàntir leh pawisa chawitir theih a ni bawk. 

1. PC Lalthlamuana, Director

2. Lalhmingliani, Cashier

3. R Vanlalhmuaka, LDC

4. Thanzami Tochhawng, Supplier