Dan loa sak kudam 20 chuang hmu chhuak

Kolasib DC Zoengsanga leh sorkar hotu dangte chuan nimin khan NH-54 kawngpui, Vairengte leh Chhimluang khaw inkar an enfiah a, dan phal loha kudam sak 20 chuang an hmu chhuak a, kuhva leh leiṭha eng emaw zat an man nghal.

Kolasib district thuneitute hian Kolasib leh Vairengte inkar NH-54 kawngpui dunga truck ding ṭhinte'n zin veivâkte tana harsatna an siama hriat a nih avangin a hmunah endik a ni a; kawngpui kamah ram neitu mimal ṭhenkhatin kudam sâin, kuhva leh leiṭha (urea) chhêk khawm nan hman ṭhin a ni.

NH-54 kawngpuia traffic jam a awm ṭhin chhan ber chu, kawngpui kama sumdawng motor tam lutuk ṭhin vang a ni a, chu'ng motor liante chu Champhai lam aṭanga state páwna pek tur kuhva leh phai lam aṭanga Champhai kaltlanga Myanmar lama phurh luh tur leiṭha (urea) inthleng tawnna hmun atana hman a nih vang a nih thu sorkar thu­chhuah chuan a tarlang.

Sumdawng motor lian tam tak awm khawm ṭhinin NH-54 kawngpuiah traffic jam a thlen ṭhin avang leh chu'ng lai hmuna kudam 20 chuang sakte chu dan loa sak a nih avangin Kolasib Bawrhsap thupekin kalhsak a ni. Sumdawnna bungrua leiṭha leh kuhvate chu dan ang taka kalpui a nih leh nih loh fiah­na document hmuh tur a awm loh avangin an man vek bawk.

Kolasib DC Zoengsanga chuan, kuhva rah leh leiṭha dah khawmna hmun kudam chu The Warehouse (Development and Regulation) Act kalh a nih thu sawiin, mahni ram chhungah pawh ni se, kudam sa turin sak phalna lak hmasak a ngaih thu a sawi a, "Kudam luahtute'n dan phalna hnuaiah sumdawnna an kalpui em tih pawh ram neitute'n an vil uluk a ngai a ni," a ti.

Zoengsanga chuan, leiṭha lak luh leh kuhva rah thawn chhuahte chu dan hnuai­a kalpui a ni em tih finfiah turin lehkha pawimawh hmuh tur a awm lo tih a sawi a; kudam neitute hnenah show cause notice pek an ni ang a, district administration phalna leh hriatpuina tel loin kudam chu hawn tawh loh tur a nih thu a sawi bawk.