MNF-te'n sorkar hnathawk an vau nasa - Congress Ṭhalai

Mizoram Pradesh Youth Congress Com­mittee (MPYCC) chuan thuchhuah siamin, AMC inthlan atana campaign vuakvêtah MNF worker-te'n sorkar hnathawkte an vau nasat thu an tarlang a; vauna tâwk sorkar hnathawkte chu thlapháng lo turin an chah.

Congress ṭhalaite chuan, "A hnathawkte hlawh batsaktute hian sorkar hnathawk an vau ngam hi a zahthlak kan ti a, vauna tâwkte'n Congress Ṭhalai min rawn hrilh zel a, hma kan lo la ang," an ti a; mi harsa leh rethei zawkte SEDP/contract hna vela an vehthlêm mekna chu awih lo turin mipui an ngen.

MPYCC chuan, Mizoram sorkar leiba tam tak inchhek khâwl tawh chu Congress kaihhruai sorkar laiin siamṭhat a ni tih sawiin, "Sorkar hnathawkte pawhin GPF pawh khuahkhirhna awm loin an duh hunah an la thei a, sorkar hnathawk pension chhuak tur pawhin pawisa an chhuahpui thei a ni," an ti a; MNF sorkar erawh chuan a hnathawkte hlawh a pûksak tih sawiin, "Sum leh pái enkawlah an hlawhchhamzia a lang," an ti.

Congress ṭhalaite chuan, "Mizoram political history a thil chiang chu, MNF-ten 'Kan ti ang' an tih chu 'Kan ti lo ang' an tihna a ni tih a chiang," an ti a; minister Robert Romawia Royte chu a mawi lo zawnga a hming a tlángthan avangin minister aṭanga bàn turin chief minister Zoramthanga an phût nawn tih an tarlang bawk.