Gharmura Mission Compound beihnaah Mizo panga an hliam, in leh lirthei hâl a ni

Gharmura Mission Compound-a awmte hnen aṭanga thu dawn danin, zan dar 9:30 velah hnam dang eng emaw zat chu Mission Compound-ah lutin, thil awmzia sawi hmasak awm loin an bei nghal. Quarters hmasa ber Gospelthanga h/o Lalramchuani, Tuithiang, Aizawlte chenna leh an kawta an car chu bei hmasa berin, an hâlsak. Gospelthanga hi mission school-a thawk niin, a nupui Lalramchuani chu evangelist a ni a, anmahni chu an him. 

Gospelthanga te quarters dawta awm school headmaster H Vanlaldika, Sihphir-te chênna chu an bei leh a, in chhunga bungruate suasama an hâl bakah, ina chengte chhungkua pawh kut an thlâk. H Vanlaldika, a nupui leh an fate pathum chu hriamhrei hmangin kut an thlâk a, an zavai hian hliam an tuar a, mi dang hliam an awm lo. 

H Vanlaldika te chhungkua hi Thawhlehni zan khan Kolasib District Hospital panpui nghal an ni a, nimin zing dar 6 vel khan Synod Hospital, Durtlang thlenpui niin, nimin khan an hliamte endika enkawl nghal an ni. 

Mission Compound beitute hi tualchhung mi dangte'n an dang a, in dang leh compound-a cheng dangte an beih leh hmain an dang thei a, zan dar 10 velah an tawlh kìrsan a ni.

He thil thleng avang hian com­pound chhunga awm zinga mi ṭhen­khat chu an tlânchhe hman a, Hrangkhawl ho awmna khuaah sahimna zawngin an tlân lut. Tlân chhuak lo eng emaw zat an awm bawk.

Gharmura Mission Compound-ah hian chhungkua 17 an awm a, an zinga chhungkaw pali chu mahnia awm niin, an vaiin mi 50 vel an khawsa a; buaina chhuah lai hian chhungkaw pakhat tih loh chu an awm vek a ni. 

Gharmura-a Mission Compound neitu leh missionary-te tír chhuaktu Mizoram Synod aṭangin executive secretary Rev. K Lalrinmawia leh Mission Board secretary Rev. C Zorammawia te Thawhleh zanah thil awm dan ngaihven turin an kal a; Kolasib DC an hmu hmasa a, DC-in kalna chi a nih rih loh thu leh kal rih lo tura a ngen angin Kolasib aṭangin Aizawl panin an lêt leh a ni. 

Synod hruaitute hian H Vanlaldika-te chhungkua chu an buaipui nghal a, Synod Hospital thlengin an hruai a ni. 

Gharmura-a missionary-te chhungkua chu nimin zing khan Mizoram lamah an rawn haw a, Assam police-in Bairabi checkgate thleng an hruai. Checkgate screening point-ah enfiah an nih hnuah Aizawl lam an pan. Rawn hawte hi mi 41 an ni a, tihfel ngai a awm avangin chhungkaw pahnih erawh chu an rawn haw ve lo thung.

Hetih lai hian, Kolasib DC chuan, missionary rawn hawte chu an awmna hmuna kîr turin Hailakandi DC-in a rawn ngen tih a sawi a, "Gharmura-a kîr tur a rawn ngen a, an tan a hlauhawm tawh loh tur thu a sawi a, full assurance a rawn tiam a ni," a ti. 

Mission Compound-a awm mekte chuan, nimin lamah an awmnaah police eng emaw zat an duty thu leh boruak a muanawm thu Vanglaini palai an hrilh a; nimina rawn haw chhote pawh, mipa ho bik chu Gharmura lamah an lêt leh nghal dawn thu an sawi bawk. 

Thawhlehni tlaia Zophaia buaina a chhuah thu an hriat ve leh Kolasib aṭangin magistrate leh SP Vanlalfaka Ralte hoin police hotute an kal nghal a, zan lama Gharmura lama buaina a chhuah thu hriat a nih veleh Kolasib DC Dr H Lalthlangliana chuan Hailakandi DC biain, buaina timit turin a ngen. 

Vanglaini palai zawhna chhangin Dr H Lalthlangliana chuan, tun dinhmunah boruak a muanawm tih a sawi a, "Hailakandi DC nen a khát tâwkin kan inbe reng a, anni lam pawhin nizan (Thawhlehni zan) khan Assam police-te venhim hna thawk turin an dah nghal a, boruak a ṭha chho zel turah kan ngai," a ti. 

Kolasib Bawrhsap chuan, buaina chhuak chu misualte thil tih a nih thu sawiin, "Hnam anga inbeihnaa lak chi a ni lo a, misual ṭhenkhatte thil tih a ni. Chuvang chuan Mizoram chhungah pawh hnam anga inbeihna anga kalpui chi a ni lo," a ti a; Mizorama páwl hrang hrangte pawh an pawl bil anga hma la lo tur leh sorkarin theih­tawp chhuaha ṭan a lâk avangin sorkar hmalakna ṭawiawm turin a ngen. 

Kolasib DC chuan, Zophaia buaina a chhuah hnuah venhim hna thawktu dah belh a nih thu a sawi a; Zophaiah Mizo IR police ṭhahnem tak dah a nih bakah, CRPF eng emaw zat dah an nih tawh thu a sawi. 

Thawhlehni tlaia buaina a chhuah hnuah páwl ṭhenkhat hruaitute chuan an hmunpui Aizawl aṭangin Bairabi an pan. Zan tìr lamah MZP leh MSU hruaitute chuan Bairabi an pan a, Central YMA hruaitute pawhin zan dar 8 velah Aizawl an chhuahsan bawk. 

MSU hruaitute chuan, Gharmura Mission Compound-a awm Mizote vai misualte'n thisen chhuaha an sawisa leh quarters leh lirtheite an hâl chu pawi an tih tak zet thu an tarlang a; pawi khawihtute chu a rang thei ang bera mana hrem ngei an phût thu sawiin, nimin zing khan Bairabi Police Station-ah MSU Gen. Hqrs President hmingin FIR an thehlut nghal a ni. 

Hetih lai hian, minister of state K Lalrinliana pawhin nimin zing khan Zophai a tlawh bakah, Gharmura Mission Compound beihnaa hliam Kolasib damdawi-in panpuite chu a tlawh nia thu dawn a ni. 

Zophai leh Gharmura-a buai­na chhuakte chu nimin khan chan­chinbumite'n ngaihvenin Zophaiah an kal a; Thawhlehnia Zophaia thil thlen dan ngaihven tuma nimina Assam lam magistrate leh official-te'n Zophaia kal an tum chu Central YMA hruaitute'n an lo hnar lêt a, an enfiah duh a nih chuan district pahnih hotute nen a huhoa en turin an hrilh tih an sawi.

Nimin vek khan Assam lam mi ṭhenkhat chu inhàwr khawmin, Mizo­ram lamah luh an tum a, Hailakandi additional SP Kulendra Nath Deka leh a hote'n an dang a ni. 

February 9, Thawhlehni chawhnu khan Mizoram sorkara Power & Electricity department mi leh sate leh Bairabi VC-te chu power line enfiah turin Zophaia an kal chu JCB hmanga Zophaia kawng làitu Assam mite nen an intibuai a, kut an inthlaknaah VC vice president H Vanlalroa leh P&E-a thawk pakhatin hliam an tuar. H Vanlalroa hi Kolasib damdawi-ina awm tura refer a ni.

He thil thleng avang hian Bairabi mipui inko khawmin, Zophai an pan a, Mizoram police eng emaw zat an kal ve nghal. Assam police leh mipui intihbuainaah mi pakhatin hliam a tuar. Thawhlehni zan tìr lam khan Zophai leh Dholchora inkara in/thlâm 19 a kâng bawk a, a kan chhan hriat a ni lo.