BSUP-a chhiatna thleng vanga Hrem ngai an awm lo - CS

July 2, 2019 tlaia Dur­tlang Leitana leiminin Basic Service to Urban Poor (BSUP) Housing Complex in a hnawl chim chungchangah hrem tur an awm loh thu, chief secretary Lalnunmawia Chuaungo chuan a sawi.

Vanglaini palai zawhna chhangin Chief Secretary chuan, chhiatna thlen dan chhuitu (Magisterial Inquiry) report-a a lan dan chuan, chhiatna thlengah hian ngaihthah (negligence) vanga thil thleng a awm loh thu tarlan a ni a, "Negligence thil a awm loh avang hian chhiatna thleng vanga hrem ngai an awm lo a ni," a ti.

Chief Secretary sawi danin, Magisterial Inquiry report-ah hian hetiang project lian dinna hmun atana an hmun thlan a fuh loh thu tarlan a ni. Report hi uluk taka zir chian zel a ni dawn a, project dang kalpui a nih leh dawn hunah report zûlzui hian thil tam tak tih theih a ni dawn.

Tarlan tawh angin, Durtlang Leitan BSUP Hou­sing Complex-a July 2, 2019, Thawhlehni tlai dar 6 pelh hreta lei leh lung tawlhin chenna in 20 zinga pathum a tichhia a, mi pathum an thi a, mi 11 an hliam a ni. He thil thleng hi magisterial inquiry anga chhui turin Mizoram sorkar chuan Aizawl DC Vanlalngaihsaka a ruat a, chawlhkar hnih chhunga report pe turin a ti.

Aizawl DC chuan state páwn lam mi thu zawhfiah ngaite an awm avangin chawlhkar hnih chhungin a chhui zo hman lo a, chawlhkar khat dang hun a dil belh angin pek a ni a; hun a dil belh a hman zawh hmaa chhui zoin, July 30, 2019 khan a report chu Chief Secretary hnenah a thehlut a ni.