Emergency Response Support System hawn a ni
Rîkrum thil a thlena mipuite'n an biak zung zung theih tur, Aizawl SP pisaa 112 Emergency Response Support System (ERSS) bun thar chu nimin khan Home minister Lalchamliana'n a hawng. Minister chuan, police-te hmasawnna turin hmalakna an neih nual tawh thu a sawi.
112 ERSS hawn pual hian Aizawl SP conference hall-ah inkhawm buatsaih a ni a; Home Minister chuan, dan leh thupek kenkawh leh thil eng emaw a thlena rang leh sâwt zawka hmachhawn theih chu police hna pui ber pakhat a nih thu sawiin, "Chutiang taka kan thawh chhuah theihna turin sorkarin kawng hrang hrangin police-te thuam chak zel turin hma a la ṭhin. ERSS chauh lo pawh system hrang hrang te, infrastructure te, a ṭul anga outpost siam belh thlengin hmalak mekna kan nei nual a ni," a ti.
Lalchamliana chuan, chhan hrang hrang vanga rîkrum thil a thlenin, lo inbuatsaih lâwkna ṭha leh rang taka chêt chhuah a, chhanchhuah hna a ṭul anga thawh vat theih chu hun rei tak ata chona awm tawh a nih thu a sawi a, "Kan ni tin nunah mi tinin hetiang hi kan tawh theih vek avangin, rîkrum thil leh thil ṭha lo thleng thei kan hriat chian a, hmachhawn dan kan zir thiam a pawimawh tak zet a ni," a ti a; ERSS hmangin sâwt zawkin rîkrum thil thleng hmachhawn theih a nih tur thu a sawi.
DGP SBK Singh pawhin thu sawiin, police-te hna pawimawh ber chu dan leh thupek kenkawh a nih thu a sawi a, "Mipuite'n police-ah beisei ang an hmu lo thei. ERSS hi mipui duhkhawp lohna lak ata police-te chhanchhuahna atana ṭha tak a ni. He thil hian police-te inrintâwkna a pe dawn a, hmun dang aṭanga Mizoram rawn tlawhtute pawhin 112 biain harsatna chinfelsak an ni thei ang. ERSS hmasawn zel atan thil dangte pawh kan belh zel ang," a ti.
Inkhawm hi IGP (Law & Order) LH Shanliana'n a kaihruai a, ERSS buntu C-DAC, Silchar-a senior director Dr KS Selva Kumar chuan ERSS nihphung a sawifiah.
Inkhawma tarlan danin, ERSS hi Ministry of Home Affairs (MHA)-in rîkrum thila mipuite'n police an biak theihna tur number inang khat 112 hman a nih theihna atana a policy a ni. Mizoramah chuan district pali - Aizawl, Lunglei, Champhai leh Kolasib chu pilot project atana hman a ni a, khawpui palia ERSS bunna atan MHA aṭangin cheng nuai 438.09 hmuh niin, cheng nuai 390 vel hman a ni tawh. Rîkrum thil leh chhiatna a thlen chángin 112 hi biak theih reng a ni a, call kher lo pawhin Google leh Apple app store aṭangin biak pawh theihna tur download theih a ni. ERSS hi ambulance, fire service motor leh police motor hmanga thuam a ni a, a ṭul dan azirin rîkrum thil leh chhiatna thlenna hmuna kal turin an inring reng dawn a ni.