Ramin a mamawh ber chu remna hnuaia Hmasawnna hna thawh a ni - HM Chama

Home Minister chuan, police-te chu remna leh muanna vawn hna thawktute an nih thu sawiin, "Ramin a mamawh ber chu remna leh muanna boruak hnuaia hmasawnna hnathawh a ni. Chumi atana thawktute police-te an ni a, chuvangin, harsatna karah pawh phunnâwi loa hna thawk tura beisei tlat kan ni," a ti.

Lalchamliana chuan, Mizoram union territory nih tirhah Assam police tlem azawng nen bul ṭan a nih thu sawiin, "Vawi­inah chuan nasa taka ṭhang lianin police strength pawh sing chuang, police station pawh 40 lai neiin kan awm ta. India ram huapa lawmman sáng dawng thei police fel tak tak tam tak kan awm tawh," a ti a, Mizoramin police chhuanawm tak tak a neih thu a sawi.

Mizoram police zingah hmelma kuta thi mi 56 an awm tawh tih sawiin HM Chama chuan, "Vawiinah hian kan police, hmelma kuta boral tate zawng zawng pawh kan hre reng a. Police-te chu ram rawngbawltu, mipui tana thawk an ni a, mipui ta an ni. Dinhmun pawimawh tak chelhtute an ni a, kan hnate rinawm taka kan thawh tlat chuan dinhmun zahawm taka kan ding thei dawn a ni," a ti.

Lalchamliana chuan, sipai tan huaisen a pawimawh tih sawiin, "Inkahnaah vawi sawm chuang ka tel ve tawh a, a huaite hi an thi hma chuang lo a, dâwih vanga thi hma tate hi an awm fo zawk niin ka hria," a ti a, police tan rilru leh taksa hrisel a pawimawh thu a sawi. 

Home Minister chuan, Mizoram police-ah hmeichhia 7% chauh an awm thu sawiin, "All India norms kan la pha lo hle a, post ruak pawh kan ngah. Sorkarin hnawhkhah dan a zawng zel dawn. Lirthei leh hmanraw danga police harsatnate pawh ka hriatpui a che u," a ti. 

DGP Balaji Srivastava chuan, Mizoram police din tirh aṭangin Mizoram tan hna an thawh nasat thu sawiin, "Vawi­inah chuan India rama crime conviction rate nei ṭha berte zinga miah a inhlang kai tawh a ni," a ti a; Mizoram chu India rama state ralmuang berte zinga mi a nih tawh thu a sawi. 

Police training pass chhuak tharte hi constable atana lak mipa 383 leh hmeichhia 23, an vaiin mi 406 an ni.

 Police Training School principal Lal­sanglura kaihhruaiin India hnam puanzar leh Mizoram police puanzar hnuaiah rinawmna thu an tiam a, H Lalrinhlua hnenah His Excellency the Governor of Mizoram Running Trophy & Gold Medal (Proficiency in All round Best) hlan a ni.