Aizawlah Mizoram Art & Photo Festival

Information & Public Relations (IPR) department chuan nimin khan Aijal Club Park-ah ni hnih awh tur 'Mizoram Art and Photo Festival' an buatsaih a, IPR minister Lalruatkima'n a hawng. Minister chuan, IPR-in in thar Lianchhiari Rûn an sak mekah exhibition hall, theatre leh art gallery-te dah tum a nih thu a sawi.

Lalruatkima chuan, khawvel changkang zelah ram leilung leh hmunhma a inthlak danglam nasa tih sawiin, "Thil thleng tawhte leh thleng mekte vawn ṭhat nan thlalak leh lemziak a pawimawh," a ti a, khawvel zau zawk thleng pha tura ṭan la leh zual turin lemziak leh thla la thiamte a sáwm. 

Minister chuan, "IPR department kaltlangin sorkarin chanchinbumite, lemziak thiam te, thla la ṭhin te, film lama tui mite nen thawhhona ṭha tak a nei chho zel a ni," a ti a; press tour, art exhibition leh film festival buatsaih ṭhin a nih thu sawiin, "Lianchhiari Rûn sak mekah art lama talent nei ṭhate tan inphochhuahna tur exhibition hall, theatre leh gallery-te dah tum a ni," a ti.

Festival buatsaih chuan rah ṭha chhuah se a duh thu sawiin Lalruatkima chuan,' 'Kan society-a a chhe lam kan sawi uar ṭhin te, chhe ta vek leh sual ta hle anga inhmuh hi a fel lo a, a chhe lam aiin  ṭha lam sawi uara infuih zawk tur kan ni,'' a ti a; beiseina thar nen hma lam hun thlir turin kal khawmte a fuih.

IPR director Lallianpuii pawhin thu sawiin, art chu khawvela ṭawng mawi ber a nih thu a sawi a, "Lemziak, thlalak, milem ker leh tuk mawi tak takte hian a hmutute thinlungah thu tam tak a sawi ṭhin. Art hmang hian chhuan lo la awm zel turte hnenah ro hlu kan hnutchhiah thei a ni," a ti a; Mizo pipu sûlhnu leh Mizo nun zia pholang thei tur thilte uar leh zuala pholang turin artist-te leh photographer-te a sáwm.

Art and Photo Festival-ah hian lemziak thiam mi 52 telin, pencil/charcoal hmanga lem ziak 15, water colour 14, acrylic oil on canvas 44, a vaiin lemziak 73 an târ chhuak a; lem ker (sculpture) paruk leh thlalak mi 28-te kutchhuak 165 pholan a ni. Vawiinah chhunzawma zawh a ni ang.