Mizoram Kailawn - Business Plan Contest Entrepreneurship Summit 2019 buatsaih

CM Zoramthanga chuan, Mizo ṭhalai zingah entrepreneurship lama tui, hlawhtling tura tih tak meuha bei an awm chu lawmawm a tih thu a sawi a, "Zoramin hma a sawn zelna turah chuan hna thawh tur zawngtu ni lo a, a ruaitu zawk nih hi bung thar kan kai theihna tur a ni. Chuvang chuan, entrepreneurship chawi kan hi sorkarin a ngai pawimawh a ni," a ti.

'Kailawn' tih thumal chuan hmasawn belh zel a tinzawn tih sawiin Zoramthanga chuan, "Mizoramin theihna, asset ṭha­hnem tak a neih  hmang ṭangkai a, intodelh leh sum lak luh tipung tura beih tum tur a ni," a ti a; entrepreneur kal khawmte chu an hmabakah ṭhahnemngai taka thawk zel turin a chah.

Chief secretary Lalnunmawia Chuaungo pawhin thu sawiin, hmasawnna atan state sorkar mai ni lo, sorkar laipui pawhin entre­preneurship a ngaih pawimawh thu a sawi a, "NITI Aayog chuan hmeichhe zinga entrepreneurship tihhmasawn a ngai pawimawh leh zual. Kumina Mizoram Kailawn intihsiaknaa finalist 40 zinga 16 hmeichhia an ni hi a lawmawm hle a ni," a ti.

IIMCIP chief executive officer Dr Subhrangshu Sanyal chuan, "Kum thum chhungin entrepreneurship lamah Mizoramin hma a sawn hle. MEDMOC hmalakna hnuaia sumdawnna bul ṭanna - Start-up-ah IIMCIP-in zirtirna a pek tawhte zinga 75% chu tun thlenga sumdawnna la kalpui an ni," a ti a; entrepreneur-te'n Mizoram economy tan an thawh hlâwk tur thu a sawi.

Summit hi hun hniha ṭhen a ni a, chawhma lamah Startup Conclave Summit neiin, chawhnuah plenary session neih a ni. Mizoram Kailawn Business Plan Competition-a finalist-te hnenah lawmman sem a ni bawk. Business Plan Competition-ah hian mi 456 inziak lutin, finalist mi 40 thlan chhuahte chu boot camp neihpui an ni a; top 20 finalist thlan chhuah leh a nih hnuah, mi panga hnenah lawmman hlan a ni.

Pakhatna:    Francis Lalmalsawma Sailo 

    (Zo Mushroom) - Rs. 4,00,000

Pahnihna:    Peter Vanlalhriata 

    (Know Waste) - Rs. 3,00,000 

Pathumna:    Dr Vanramhlimpuii 

    (Zonu Meat Processing) - Rs. 2,00,000

Promising Ideas Award 

    Lalruatfela (Doorbell) - Rs. 50,000

    Lalrinpuii Hmar (Blue Montis) - Rs. 50,000