Hmun hrang hrangah Poshan Rally neih a ni

Rashtriya Poshan Abhiyaan (RBA) hnuaia India ram puma kalpui mek Rashtriya Poshan Maah (National Nutrition Month) pualin nimin khan Mizoram hmun ṭhenkhatah Poshan Maah Rally huaihawt a ni a; sorkar official-te leh zirlai naupangte telin, naupangte leh nute hnena chaw ṭha pek pawimawhzia an puang.

Tlangnuam ICDS Project chuan nimin khan Tlangnuam, Saikhamakawn, Melthum leh Hlimenahte Poshan Maah Rally an buatsaih a; veng palia sorkar sikul - primary school, middle school leh anganwadi centre-a zirtirtute, thawktute leh naupangte an tel. Tlangnuam BDO Andy Lalfakzuala Varte-in a vai liam bakah, kawng tluanin a telpui a ni.

Lungleiah pawh Poshan Maah Rally buatsaih niin, Lung­lei DC pisa kawt aṭanga MIZO­FED kawt záwl thleng kawng an zawh a, Lunglei SDO (Sadar) Lalnundika'n a vai liam. Kawngzawha telte chu chaw ṭha pawi­mawhzia thu hmangin an au rual a; hriselna leh faina kawngah thutiam (oath taking) an nei bawk.

Champhaiah pawh Dar­thangvung Traffic Point leh DK Traffic Point inkar, Champhai Vengthlangah Poshan Rally neih a ni a, chumi zawhah Champhai Vengthlang P/S-II ah Poshan Maah hnuaia theme hrang hrangte inhrilhfiahna hun hman leh a ni. Rally-ah hian zirlai naupang, Anganwadi Worker leh naupang te, tlawmngai pawl hruaitu te, ASHA volunteer te, health worker-te leh line department aiawhte an tel.

RBA (National Nutrition Mission) hi March 2018 aṭangin India ram pumah kalpui niin, Mizoramah pawh hmalak nghal a ni a, Mizoram chuan kum 2018-19 chhunga RBA hnuaiah hma a lak ṭhat avangin tun hnai khan India rama award pathum zinga pahnih an la a, lawmmanah cheng nuai 250 an dawng.

September thla pum chu Rashtriya Poshan Maah (National Nutrition Month) atan puan a ni a, hman mek a ni. Poshan Maah chhungin chaw ṭha (nutrition) leh hriselna chungchang inhrilhhriatna leh inzirtirna state pumah hman tur a ni a, hman mek zel a ni bawk. Kumina an au hla (slogan) chu 'Jar ghar poshan vyavahar' (Change of behavior in each home) tih a ni.

1.    1,000 days (Nau pian aṭanga ni 1,000 chhung)

2.    D2 Campaign - Defeat Diarrhea

3.    Diet Diversity - Complementary feeding

4.    Anaemia prevention T3 camp - test, treat, talk anaemia

5.    Hygiene, sanitation & safe drinking water