Aizawl dist.-a khaw fai ber Suangpuilawn
Public Health Engineering (PHE) department buatsaihin nimin khan Tourist Lodge, Chaltlangah Swachh Prerak Day 2019 hman a ni a, Aizawl DC Vanlalngaihsaka'n a hmanpui. Fai lawmman chi hrang hrang sem a ni a, Aizawl district-a khaw fai bera thlan chu Suangpuilawn a ni.
Aizawl bawrhsap Vanlalngaihsaka chuan, taksa leh chenna in vawnfai chu mihringte dam chhung hna tur a ni tih sawiin, "In leh a vêl vawn fai ringawt hi a tâwk lo a, bawlhhlawh paihnaah kan fimkhur tel tur a ni a, a paihna hmunah chauh kan paih tur a ni. Khua leh tui ṭha kan nih chuan faina kawnga thuneitute hmalaknaah hian kan tel ve vek a ni," a ti. Faina lama lawmman dawngte a lawmpui thu a sawi rualin, lawmman dawng ve lote chu hnual loa ṭang zel turin a fuih.
Swachh Prerak Day inkhawm hi superintending engineer Lalrammawia, Swachh Bharat Mission Aizawl district executive vice chairman ni bawkin a kaihruai a; Aizawl district-a thingtlang khaw faite faina lama thawk ṭhate hnenah lawmman sem a ni.
Inkhawmah hian Aizawl district-a khaw fai bera thlan Suangpuilawn khaw hnenah lawmman Rs. 15,000 leh thuchei hlan a ni a; pahnihna Thingsul Tlangnuam hnenah Rs. 10,000 leh pathumna North Lungpher hnenah Rs. 5,000 hlan a ni.
Swachh Bharat Summer Internship programme-ah pakhatna chu 1st Mizoram Bn. NCC, Aizawl niin, lawmman Rs. 30,000 an dawng a, pahnihna Thingsulthliah Higher Secondary School NSS hnenah Rs. 20,000 leh pathumna 20th Mizoram Independence Coy NCC hnenah Rs. 10,000 hlan a ni. WATSAN Committee ṭha 10 hnenah Rs. 10,000 ṭheuh pek a ni a, Swachhagrachi ṭha 10 hnenah Rs. 5,000 ṭheuh hlan a ni bawk.
WATSAN Committee Ṭha 10
Phullen WATSAN
Thingsul Tlangnuam WATSAN
Sesawng WATSAN
Suangpuilawn WATSAN
Nausel WATSAN
Maubuang WATSAN
Palsang WATSAN
Sihphir WATSAN
Darlawng WATSAN
Sailam WATSAN
Swachhagrahi Ṭha 10
Vanlalrawna, Vanbawng
Lalvenmawia, Daido
Lalhlimpuii, Muallungthu
Jonathan Lalramsanga, Chawilung
L Sawikimi, Sihphir
Malsawmtluanga, Sihphir
C Lalnunthara, Darlawng
R Lalhmunliani, Thingsul Tlangnuam
C Lalhunmawia, Palsang
Zakaptluanga, Vaitin