Thu dik zîktluak lo hmanga inbeihna Ramin a ṭhatpui lo - Dr Vanlalthlana

ZPM Legislature Party (ZLP) secretary Dr Vanlalthlana chuan office of profit laah leh MLA fund a hman danah thu dik loa beih a nih thu sawiin, "Thu dik zîktluak lo hmanga inbeihna hi kan ramin a ṭhatpui lo," a ti.

Dr Vanlalthlana hian nimin khan Aizawl Press Club-ah thuthar theh­darhtute a kâwm a; Congress party-in amah leh MNF MLA pathumte chu office of profit laa puha MLA aṭanga paih tura Governor hnena an ngenna an thlenah, college leh MLA hlawh la kawp anga an chhuah thu a sawi a; sum lâk theih ang ang chuh vek anga lang thei tura sawi an ni chu pawi a tih thu a sawi a ni.

Puh a nihna chu a tìrah chuan chhàn ṭul loa a ngaih thu sawiin Vanlalthlana chuan, "Ram siamṭhat duh, a bik takin ṭhalai tam tak thinlungah a dik lo zawnga a than theih avang leh mi eng emaw zat rilru na takin an awm tih ka hriat avangin ṭawng chhuah a ṭul a ni," a ti.

ZLP Secretary chuan, "Sum duhna vanga MLA tura ding ka nih loh avangin, MLA-in electric bill, tui bill, internet bill, phone bill leh chanchinbu bill-te hi a tìr têa tui bill vawi khat ka lâk ve bâk chu ka la tawh lo," a ti a; college aṭangin Extra Ordinary Leave (EOL) a lâk loh avangin Assembly Speaker hriattirna nen MLA hlawh a la lo tih a sawi. 

Vanlalthlana chuan, "Class la ngai lo leh college kalsan vang vang anga min puhna phei chu defamation case file-na tham a ni. Class lâk chu sawi loh, nimin leh chawhma mai khan kan college accounts buaipuiin ka la tei thla a ni," a ti.

Dr Vanlalthlana sawi danin, University Grant Commission (UGC) meeting-ah university leh college-a thawkte MP/MLA an nih chuan an university/college aṭangin hlawh an la ang a, hamṭhatna dang (allowance) an lâk theihte chu Parliament/State Legislature Secretariat-ah an la tur a ni, tih a ni.

Joint Committee on Offices of Profit-in assistant professor ni lai MP-a tling Dr Anupam Hazra chungchanga thutlukna a siam, August 13, 2015-a Lok Sabha leh Rajya Sabha-a pharhah pawh office of profit a nih loh thu an tarlang.

Tun hnaiah MNF-in MLA fund hman danah social media-ah amah chu an bei tih sawiin Vanlalthlana chuan, "Kum 2023-a lal leh an tumna atan hnawksaka min ngaih bakah, AMC inthlan hmaa ka thu hriatte ka sawi chhuah an hlauh vanga hma la ta an ni tih ka hriatin, ka lawm letling khawp mai," a ti a; an beihna chu Bethel Welfare, Ramthar North-in sawifiahna an siam thuai tura a ngaih thu a sawi.

Aizawl North-II bialtu MLA chuan, a bial chhungah Local Development Committee dinin, local council, tlawmngai pawl leh political party aiawhte leh veng chhunga paràwnte an tel thu a sawi a, "Rîkrum thil leh chhiatna thlen thei thil a nih loh chuan kan mamawh bera kan hriatte chu a tahtawlin kan siam ṭhin," a ti.

ZLP Secretary chuan, thu dik hmanga beihna tur an hriat chuan beih a inhuam thu sawiin, "Mihring famkim kan awm lo a, insiamṭhatna atan ka lo hmang zel ang. Party dangte pawh ka fund hman dante min vênpuia min chhuipui turin ka ngen a ni," a ti a; thu dik zîktluak loa inbeihna erawh chu ramin a ṭhatpui loh avangin kalsan tawh ni se a duh thu a sawi.