Mizo puan humhalhtu tur committee din
Art & Culture department chuan, sorkar laipuia Department for Promotion of Industry and Internal Trade (DPIIT)-in Mizo puan pangate Mizo ta a ni tih chhinchhiahna, geographical indication (GI) tag/registration a pekte enkawla humhalhtu tur 'Committee on Inspection Structure for Geographical Indication of Traditional Mizo Puan' a din.
Committee hi kum thum term nei tura din a ni a, Mizo puan panga (Puanchei, Tawlhlohpuan, Pawndum, Ngotekherh leh Hmàrám)-te kumin August 16 & 22-a GI tag pekte tah chhunzawm zel dan turte leh a ṭul dangte Art & Culture department-in benchmark a siam zûlzuiin an enkawl dawn a ni.
Art & Culture department hotute chuan, Mizo puan panga GI tag/registration pek tawhte rawng kaia thil siam chhuahna hrang hrangah khapna dan siam an tum loh thu an sawi a, "Mi eizawnna tihchhiat theihna a ni dawn a, chuvangin, kan khap thei lo. Mahse, heng puante nih dan phung leh ziaráng dik tak (original) erawh Art & Culture department-in kan kawl dawn a, mipuite hmuh theih turin phochhuah kan tum," an ti.
Committee on Inspection Structure for Geographical Indication of Traditional Mizo Puan-ah hian chairman chu Art & Culture Secretary a ni dawn a, Art & Culture Director chu member secretary a ni. Committee-a member dangte chu - Commerce & Industries director, Art & Culture joint director, senior research officer, Mizoram Science, Technology & Innovation Council (MISTIC) Patent Information Centre-a scientific officer, Mizoram Handloom & Handicraft Cooperative Society Ltd.-a chairman, MUP president, Central YMA president, MHIP Gen.Hqrs. president, Boichhingpuii (Chaltlang) leh Lalhlimpuii (Zarkawt)-te an ni.