COVID-19: Mizoram dinhmun Hripui vei mi 5 hmuh belh a ni
January 25, Thawh-ṭanni khan Mizoramah Covid-19 vei mi panga hmuh chhuah a ni a, Mizoram tualchhunga kái pathum an awm. Nimin khan hripui laka fihlîm tawh mi pahnih chhuahtir an ni.
Covid-19 vei Thawh-ṭannia hmuh thar pangate chu ZMC laboratory-a RT-PCR hmanga hmuh chhuah vek leh Aizawl district-a mi vek an ni a; TrueNAT-PCR leh Rapid Antigen Test (RAT) hmanga swab sample endik zingah hripui vei hmuh chhuah a ni lo.
Covid-19 laka fihlîm tawh mi pahnih chu nimin khan chhuahtir an ni a, SRH-ZMC aṭanga chhuak ve ve an ni. Mizorama Covid-19 vei hmuh chhuah tawh chu mi 4,356 an ni a, mipa 3,187 leh hmeichhia 1,169 an ni. Nimin tlai dar 5 thleng khan mi 4,300 (98.71%) chhuahtir an ni tawh a, mi pakua (0.21%) thi tawhin, enkawl mek mi 47 (1.08%) an awm.
January 25, Thawhṭanni khan ZMC laboratory-ah swab sample 398, TrueNAT-PCR hmangin district pariatah sample 166 leh RAT hmangin district 11-ah sample 780 endik a ni a; sample endik zawng zawng chu 1,344 niin, chu'ng aṭanga Covid-19 vei hmuh chhuah mi panga chu 0.37% a ni.
Sorkar thuchhuah tarlan danin, Covid-19 positive Thawhṭannia hmuh chhuahte chu mipa pathum leh hmeichhia pahnih an ni a, kum 16-53 inkar, Aizawl district-a sample lak vek an ni. An zinga pathum chu tualchhunga kái chhâwng niin, mi dang pahnih chu tun hnaia state páwn aṭanga rawn lut an ni a; Covid-19 symptom nei an awm lo.
January 25, 2021 thlenga Mizorama swab sample endik tawh zat chu 2,02,585 a ni a, chu'ng aṭanga Covid-19 positive mi 4,356 chu 2.15% a ni. Hripui vei hmuh tawh zinga mi 2,059 chu Mizoram chhunga kái an ni a, mi 2,297 chu Mizoram páwn aṭanga an rawn luh hnua hmuh chhuah an ni thung.
Covid-19 +ve hmuh tharte:
Zarkawt - 1: Hmeichhia kum 16, tualchhunga kái leh kàina hriat, home quarantine lai, symptom nei lo.
Upper Republic - 1: Hmeichhia kum 39, tun hnaia Shillong aṭanga haw, quarantine facility-a awm mek, symptom nei lo.
Mana Motors - 2: Mipa kum 21 & 28, Mana Motors, Durtlanga thawk, tualchhunga kái, kaina hriat, Hotel Serow-a inkhung lai, symptom nei lo ve ve.
AR, Zokhawsang - 1: Mipa kum 53, 46 Assam Rifles mi leh sa, tun hnaia Kerala aṭanga rawn lut, Zokhawsanga khung hran mek, symptom nei lo.