Congress ṭhalai an inhlanthar

Mizoram Prasesh Youth Congress Committee (MPYCC) chuan nimin khan Congress Bhavan-ah kumthar atana inhlantharna hun an hmang.

Inhlantharna hun hi MPYCC treasurer Laltawnliana'n kaihruaiin an president Dr Lalmalsawma Nghaka chuan tunlaiah ṭhalaite nationalism-ah an harh thar hlea a lan thu sawiin, "Congress party hi Mizo nationalism ngaihsaktu party a ni a, ka chauha sawi ve loin a tak taka hmala leh che chhuak ṭhin kan ni," a ti a, Mizo Union zunzam Mizorama Congress party-ah a la awm thu a sawi.

Dr Lalmalsawma chuan AMC inthlanah ṭhalai engemawzat an in candidate avanga an lawm thu sawiin, "Amaherawhchu state sorkar hlau chunga councillor turte thlang loa councillor chak leh hnathawk thei thlang turin Aizawl khawpui chhunga ṭhalaite ka sawmin ka ngen a ni," a ti. 

Thusawitu dang MPYCC vice president F Lalhmangaiha chuan, "Tun ṭum AMC inthlan turah Congress party-te'n candidate ṭha tak tak kan nei hi a lawmawm hle. Therhlo leh sum nena ruling party-te an che vak a nih loh chuan beiseina  sang kan nei. MNF-te hian development lehkha chaih a hrui awm si lo hi Aizawl khawpui ah hian an chaih mek a, state sorkar hi sumah an harsa em em a ni," a ti.