Hmun hrang hrangah Republic Day lawm a ni

Nimin khan Mizorama district khawpui tinah leh khua/hmun dang ṭhenkhatah India Republic Day vawi 72-na lawm a ni a; district headquarters-ah chuan bawrhsapte khuallian niin, khaw dang ṭhenkhatah chuan SDO leh BDO-te khuallian an ni.

Lungleiah chuan zing dar 8-ah DC pisa tualah lawm a ni a, bawrhsap V Lalsangliana'n hnam puanzar a pawt pharh. 2nd Battalion MAP-te'n parade-in hnam puanzar chibai an bûk.

Lunglei DC tarlan danin, kum 2020-21 chhungin SEDP hnuaiah vaimim chi leh a enkawlna tur hmanrua sem a ni a, agriculture link road km. 30.06-a thui laihna atan cheng nuai 150.80 hman a ni. Economic & Statistics hnuaiah kum 2020 chhungin birth certificate 703 leh death certificate 70 pek chhuah a ni a; Excise & Narcotics-in chhiah Rs. 7,80,870 an hmu. National Food Security Act hnuaiah ration card 45,413 a awm.

Faina Hapta 2020 puala intihsiakna lawmman sem a ni a; veng fai berah Zotlang puan niin, Salem Veng leh Pukpui ten an dawt. Kumtluana faina lama hma la ṭhaa puante chu - Lunglawn, Chanmari, Serkawn leh Sethlun te an ni. Damdawi-in, sumdawnna hmun, high school, pisa, workshop, restaurant leh hotel faite thlan a ni bawk.

Siahaah chuan zing dar 9 khan Circuit House kawtah bawrhsap Kesavan R hoin hman a ni a, sorkar pisa hotute leh sawm bikte an tel.

Bawrhsap tarlan danin, NH-54 kawngpui zauh leh siamṭhat hna Kaochao-Tipa inkar zawh a ni tawh a, Rehabilitation & Resettlement award hlan a nih hma chuan chhunzawm a ni dawn rih lo. MGNREGS hnuaiah kum 2020-21 chhungin ni 96 inhlawhna siam a ni tawh a, job card nei mi 16,492 an awm. SEDP hnuaiah Tisopi, Siata leh Zyhno-a chhungkaw 75-te vaimím chìntir tawh a ni.

R-Day lawmnaah hian Beti Bachao Beti Padhao hnuaia hna thawk ṭha mi 10 leh child sex ratio inthlauh siamṭhatna kawnga thawh hlawk VC pahnih Noaotlah-I leh Lopu hnenah chawimawina hlan a ni a; home, jail leh damdawi-inahte thilpek hlan a ni bawk.

Champhaiah chuan zing dar 8-ah DC bangla tualah lawm a ni a, bawrhsap Maria CT Zuali khuallian a ni. DC hian thu sawiin, sorkar hmalakna hrang hrang a sawi lang.

Champhai khawpui chhunga fai inelna Swachh Survekshan 2020-a ti ṭhate hnenah lawmman hlan a ni a; veng fai ber chu Kahrawt niin, Kanan Veng leh Zote chu pahnihna leh pathumna an ni. Sikul fai berah R Hranga H/S, sorkar pisa fai berah SP office, damdawi-in fai berah District Hospital, hotel fai berah Hotel Chawngthu, restaurant fai berah Gilgal Restaurant thlan a ni bawk.

Kolasib-ah pawh zing dar 8-ah DC pisa tualah hman a ni a, district bawrhsap Dr H Lalthlangliana khuallian niin, thu a sawi bakah Faina Hapta puala inelna lawmman a sem.

Kolasib khawpui chhunga veng fai bera thlan chu Electric Veng a ni a; sikul fai berah Chawngfianga M/S, pisa fai berah PHE pisa, damdawi hmun fai berah District Hospital, restaurant fai berah RC Restaurant, bazar fai berah Diakkawn Bazar thlan a ni.

India rama Best Woman Scientist Award dawngtu Dr Michelle C Lallawmkimi, KVK senior scientist & head hnenah chawimawina hlan a ni a; VL Thanpuii, RK Lianzuala leh Rothanmawii te hnenah Best House Construction Award under PMAY(U) 2019 an dawn avang leh, fireman Vanlalruata hnenah Fire Service Medal for Meritorious Service hlan a ni bawk.

Serchhipah chuan DC pisa tualah hman niin, bawrhsap Kumar Abhishek-a'n hnam puanzar a pawt pharh. Zing karah home/centre, jail leh damdawi-inahte R-Day pualin thilpek hlan a ni.

Bawrhsap tarlan danin, kum 2020 chhung khan Serchhip district-ah Police-te'n thubuai 83 an ziak lut a, thubuai 68-ah chargesheet thehlut tawhin, thubuai 25-a thubuai neite thiam loh chantir a ni. Nikum chhungin an district-ah nau piang 952 an awm a, chu'ng zinga 12 chu an thi a, IMR chu 12.6 a ni. Covid-19 vangin home quarantine mi 1,214, quarantine facility-ah mi 2,342 leh community quarantine centre-ah mi 208 an awm tawh a; Covid-19 vei mi 178 awm tawhin, an zinga pakhat a thi.

Faina intihsiaka lawmmante sem a ni a; bazar fai berah Chhiahtlang Bazar, hotel fai berah KH Hotel, damdawi-in fai ber Mercy Hospital, restaurant fai ber Om Om Cafe, sikul fai ber PCR H/S, pisa fai ber PHE pisa leh VC fai ber Chhiahtlang North VC thlan a ni.

Lawngtlaiah chuan zing dar 8:30-ah CYLA Khelmualah lawm a ni a, district bawrhsap Dr Andrew H Vanlaldika khuallian a ni.

Khuallianin a tarlan danin, Lawngtlai district-ah MGNREGA hnuaiah job card nei mi 33,938 awmin, kum 2020-21 chhungin ni 77 inhlawhna siam a ni tawh. January-December 2020 chhungin nau piang 3,557 leh mitthi 524 an awm a; ration card nei chhungkua 19,256 an awm. January 22, 2021 thlengin Lawngtlai district-ah lirthei 7,439 chhinchhiah a ni tawh a; KMMTTP kawngpui siamah hna 95.43% zawh a ni tawh bawk.

Lawngtlai khawpuia fai lama intihsiakna lawmman sem a ni a; veng fai berah College Veng, sorkar pisa fai berah Land Resources, Soil & Water Conservation pisa, zirna-in fai berah ANM School, Region H/S leh Southern Standard M/S leh, restaurant fai berah Zero 7 Restaurant & Diner thlan a ni.

Mamitah pawh R-Day hi DC pisa tualah hman a ni a, bawrhsap Dr Lalrozama khuallian a ni. DC tarlan danin, SEDP hnuaiah kut hnathawktute hnenah sprayer 125, vaimim nuaina khawl pali, hlo túr, bekang chi quintal 3, behliang chi qtl. 3, chana chi qtl. 6.50 leh leh pipe metre 6,000 sem a ni tawh. Kum 2020 chhungin oil palm chi 4,850 sem a ni a, oil palm rah metric ton 2,532.71 thar niin, chu chu Rs. 1,39,29,905 man a ni.

Mamit district hi NITI Aayog hnuaiah India rama Aspirational District 115 zingah a tel avangin, tehna chi nga - Health & Nutrition, Education, Agriculture & Water Resources, Basic Infrastructure leh Financial Inclusion & Skill Development hmangin thla tin department-te hnathawh dan endik a ni ṭhin.

Faina lama inelna lawmman sem a ni a; Mamita veng fai berah Bazar Veng leh sorkar pisa fai berah District Court thlan a ni. R-Day pual hian Mamita home leh District Hospital-ah thilpek hlan a ni bawk.

Saitualah chuan chawhma dar 10-ah Saitual College tualah lawm a ni a, bawrhsap VL Hruaizela'n hnam puanzar a pawt pharh.

Bawrhsap tarlan danin, Saitual district-ah PMAY-Housing for All hnuaiah in sak ṭanpuina first instalment chhungkaw 312 hnena pek a ni tawh a, Saitual District Hospital huam chhungah sub-centre pariat leh health clinic panga a awm mek.

Saitual khawpui chhunga faina lama intihsiakna lawmmante sem a ni a; chhun dar 12-ah Saitual damdawi-in leh Hlimna Inah R-Day pual thilpek hlan a ni bawk.

Khawzawlah chuan bawrhsap Zothanmawia hoin DC bangla kawtah Republic Day hman a ni a, police-in parade neiin hnam puanzar chibai an bûk.

Bawrhsap sawi danin, Khawzawl Hospital-ah September 20, 2020 khan TrueNat laboratory hawn a ni a; Khawzawl district-ah BPL awm lohna khua panga - Chawngtlai, Riangtlei, Pàmchung, Tlangmawi leh Rabung-te a awm. Khawzawl Police Station chu July 16, 2020 khan Ministry of Home Affairs-in Best Police Station-ah a puang.

Faina lama intihsiakna lawmman sem a ni a; Khawzawla veng fai berah Zuchhip, sikul fai berah Vengthar M/S-II, sorkar pisa fai berah KVK, damdawi-in fai berah District Hospital, bazar fai berah Taidawnkawn Bazar thlan a ni. Faina chungchanga lemziak intihsiakna lawmman sem a ni bawk.

Hnahthialah chuan chawhma dar 10:30-ah DC Office Complex-ah lawm a ni a, sorkar pisa hotute leh khawtlang hruaitute telin, bawrhsap Vanlalmawia khuallian a ni. Bawrhsap chuan an district chhunga sorkar hmalakna leh hnathawhte a tarlang.

Faina lam hawi editorial-a ziak ṭha berah Calathea chanchinbu thlan a ni. 3 Minute Video-Making Competition, Photo Challenge, Slogan Writing Competition, Drawing Competition, Banner Competition, Wall Painting Competition, veng, hotel, restaurant, pisa leh sikul fai lawmmante sem a ni bakah, State Award for Teacher dawngtu Vanlalhliri Sailo, Hnahthial H/S headmistress hnenah chawimawina hlan a ni bawk.

Republic Day hi Thingsulthliah BDO pisa tualah pawh hman a ni a, Tlangnuam BDO Josephine Zonunsangi khuallian niin, hnam puanzar a pawt pharh. Darlawn BDO pisa tualah chuan Darlawn BDO Lalfakawma Chhakchhuak khuallian a ni.

Gauhati High Court, Aizawl Bench pawhin an pisa tualah an hmang a, Gauhati High Court judge Justice Ajit Borthakur chu khuallian niin, hnam puanzar a pawt pharh. Mizoram University campus-ah pawh hman a ni a, vice chancellor Prof. KRS Sambasiva Rao khuallian niin, MZU-a officer, zirtirtu leh campus chhunga chêngte an tel.