KHAWTHLIR

State Election Commission (SEC) chuan AMC inthlan kaihhnawiha zawhna zâwt duhte tan helpline no. 7629857453 a ruahman. Helpline hi hman theih nghal a ni.

 

Serchhipa hmunpui nei Assam Rifles leh Champhaia Excise & Narcotics mite chuan January 25, Thawhṭanni khan Zokhawtharah tualchhung zu fûn 140 leh beer báwm 10 an man. An thil man hi tualchhunga hralhna ang chuan Rs. 1,18,000 man a ni.

Sangau-IV VC leh tlawmngai pawl hrang hrangte chuan an khuaa hmeithai pakhat in an saksak a, nimin khan VC president S Liankhara'n a neitu tur hnenah a hlân. In hi Assam type, a dung ft. 24 leh a vâng ft. 16-a zaua sak a ni a, January 16, 2021 khan sak zawh a ni.

State Institute of Rural Development & Panchayati Raj, Water and Sanitation Support Organization leh PHE department-te bultumin nimin khan Champhaia IPR auditorium-ah Jal Jeevan Mission kaltlangin cement mistiri (mason) leh tui pipe vuah leh a chhe siam dan zirna buatsaih a ni a, DC Maria CT Zuali'n a hmanpui. Training-ah hian Champhai district-a khaw 35 aṭangin cement mistiri 26 leh plumber 42 an tel a, vawiinah khaw dang tan buatsaih leh a ni ang.

Nimin tlai dar 5 dinhmun angin, State Referral Hospital-ah Covid-19 vei mi pali enkawl mek an ni. 

SRH-ZMC Bulletin 

tarlan danin, mi palite zinga pakhat chu RT-PCR hmanga a swab sample endiknaah a negative tawh vangin ICU Extension-ah enkawl mek a ni a, oxygen pek a ni. Mi dang pathum chu Isolation ward-ah an awm a, harsatna lian tham nei an awm lo.