Congress-in AMC manifesto tlangzarh
Mizoram Pradesh Congress Committee (MPCC) chuan January 25, Thawhṭanni zan khan Ignite Studio-ah AMC inthlan awm tura an manifesto an tlangzarh a, MPCC treasurer Zodintluanga Ralte, MLA-in thu a sawi.
Zodintluanga Ralte chuan, an party-in Aizawl khawpui chhunga an ngaih pawimawh ber chu bawlhhlawh senghawi dan a nih thu a sawi a, "Sanitation hi AMC thuneihna liau liau a ni a, Aizawl thianghlim leh thianghlim loh pawh hi AMC kut a ni. State sorkar a inrawlh thei lo. AMC-ah hian mipuite'n Congress party min thlang tling a nih chuan, sorkar kan din aṭanga kar khat chhungin bawlhhlawh paih dan mipui tana awlsam zawk leh ṭha zawkin kan siam nghal dawn," a ti.
MNF sorkar lai aiin Congress sorkar laiin mipui an zalen zawk nia sawiin MPCC Treasurer chuan, "MNF sorkar laiin inrûkbo, rûkrûk leh tualthihna a tam em em. Kum 2019 kha kum nga chhunga rûkrûk tam ber kum a ni a, kum 2020 kha kum nga chhunga tualthi an tam ber kum a ni. Congress sorkarah chuan mipuite zalen leh hahdam takin kan awm thei a ni," a ti a; Congress sorkarah sorkar hnathawk hlawh pek theih loh leh GPF lak theih loh a awm ngai loh thu a sawi.
Manifesto Drafting Committee member John Siamkunga, MPCC general secretary chuan an party manifesto a sawifiah a, a tlangzarh nghal. Congress party candidate-te mipui hnena hmelhriattirna hun hman a ni. Candidate-te aiawhin ward no. V-a ding tur Rosiamngheta'n thu a sawi a, "Ward tinah Congress candidate-te lo thlang tling ula, hna kan thawk ang. In vote-in min fiah ula, in mitin kan hnathawh in hmu ngei ang. Pathian leh mipuite zara chakna min pe a nih chuan, kan ti beidawng lo ang che u," a ti.
AMC-a Congress party manifesto
4 Zo fate Jerusalem Aizawl khawpui hi khawpui nuam, thianghlim leh hrisel zawkah siam a ni ang.
4 Khawpui him leh dan lalnaah siam a ni ang.
4 Aizawl hi awlsam zawka eizawn theihna leh mi retheite thlamuanna khawpuiah siam a ni ang.
4 Aizawl hi khawsak awlsamna khawpui, awlsam taka mipuiin an mamawh an neih zung zung theihna a ni tur a ni.
4 Zirna atana hmunpui ṭha lehzualah Aizawl siam a ni ang.
4 Congress party-in sorkarna a siam a nih chuan AMC chak zawk leh awmze nei zawk siam a ni ang.
4 Khawpui enkawltu tura siam a nih ang ngeiin danin a sawi ang zelin Aizawl khawpui enkawl hna hi AMC-in a thawk tak tak tawh ang.