Mizorama khawpui fai ber Lunglei

UDPA department bultuma Mizorama khawpui (census town) fai thlannaah Lunglei chu khawpui fai berah thlan a ni a, district khawpui zinga fai berah thlan a ni nghal bawk.

Nimina Lammuala Republic Day lawmnaah Mizoram Khawpui Fai Intihsiakna 2020 result puan a ni a, lawmman dawngtute hnenah Governor PS Sreedharan Pillai-a'n lawmmante a hlan.

Nimin vêk khan khawpui fai inelnaa ti ṭhate lawmpuina hun Aijal Club-ah buatsaih a ni a, UDPA changtu deputy chief minister Tawnluia'n a hmanpui. Tawnluia chuan, lawmman dawngtute a lawmpui thu sawiin, "Sorkar chu a bul tumtu chauh a ni a, a taka thawktute chu VC/LC member-te leh NGO-te an ni," a ti a; faina ngainat kawngah theihtawp chhuah zel turin a sáwm. 

Dy. CM chuan, Mi­zoram pumpui chu páwn lama inthiar awm loh­na, open defecation free (ODF)-ah puan a nih tawh thu sawiin, "ODF ni turin UDPA department chuan ṭan a la mek. Faina beihpui hi páwngpaw tih chi a ni lo a, mi rilruah tuh a nih loh chuan awmzia thui tak a nei thei lo," a ti.

Inkhawm hi UDPA secretary Dr C Vanlalramsanga'n a kaihruai a, Rural Development minister Lalruatkima pawhin thu a sawi. Khawpui Fai Intihsiakna 2020 hi category pahnih - district headquarters leh khawpui dangteah ṭhen a ni a, khawpui 23 an tel. Nodal officer viak ṭha, khawtlang hûi khawm thiam leh kaihruai ṭha Best Nodal Officer leh khawtlang hruaitu ṭha, faina leh thianghlimna kawnga hnathawk ṭha Best Village Council thlan a ni bawk.

Best Nodal Officer atan Dorothy Muansangi, North Vanlaiphai SDO(C) thlan niin, lawmman Rs. 10,000 hlan a ni a; Best VC lawmman dawngtute chu - Lengpui VC hnenah Rs. 30,000, pahnihna Tlabung VC hnenah Rs. 20,000 leh pathumna Bairabi Joint VC hnenah Rs. 10,000 hlan a ni.