Mizoramah Republic Day lawm a ni
Nimin khan India ram pumah Republic Day vawi 72-na hman a ni. Mizoramah pawh hmun hrang hrangah lawm a ni a, Aizawlah chuan Lammualah hman niin, Governor PS Shreedharan Pillai-a'n hnam puanzar a pawt pharh a, parade contingent-te'n hnam puanzar chibai an bûk a chháng lêt.
Governor chuan, Republic Day chu a pawimawh avangin Covid-19 léng karah pawh India khua leh tuite'n an awmna hmun ṭheuhah inpumkhatna lantirin an hmang tih a sawi a, "India ram leh mipuite hma lam pana ke kan pên mek lai hian, keini leh kan fate chauh ni lo, mi tin tana hma lam hun muanawm leh phûrawm tak a thlen theih nan ram danga chengte nena pheikhai rual taka kal hi kan duh dan a ni," a ti.
Mizoram sorkar hmalaknate thâ thlah loa thláwptu kohhran, tlawmngai pawl, mipui leh rál hmatawnga bei tura pên chhuakte avangin Mizoramah hripui léng a ziawm hle tih sawiin Larsap chuan, "Ram chhung hmun dangte nena khaikhinin Covid-19 avanga damlo an tlem a, he natna vanga thi tlem berna state kan ni," a ti a; Mizoramin hripui vanga hun harsa leh khirh a hmachhawn dan chu chhuanawm a tih thu a sawi.
Governor chuan, Republic Day pawimawhna hre thar turin mipui a chah a, "India ram hi tu thuhnuaiah mah kûn loa mahnia inrêlbâwl thei mipui sorkar, harsatna tam tak paltlang hnua 'Ram Danpui' kan neih tak avanga he ní hi ropui taka lawm kan ni. August 15, 1947-ah India ramin zalenna sual chhuak mah se, constitution nei thei tur hian kum hnih leh a chanve a la duh a ni," a ti.
India ram a pian theihna tura hnam pasalṭhate inhlanna theihnghilh a nih dawn loh thu sawiin Shreedharan Pillai chuan, "An inpekna leh chànna nasatzia hre rengin keini pawhin mipui sorkar inrêlbàwlna dik, zalenna, dikna, intluktlanna leh inunaunate hi kan vawng nung reng tur a ni," a ti a; hmasawn turin inpekna thar nen kawng dik zawh tur leh hmasawnna rahbi thar chuangkai zel tura inbuatsaih turin mipui a sáwm.
Republic Day lawmnaah hian Governor hian Mizoram sorkar hmalakna hrang hrang a sawi lang a, "Dan leh thupek kenkawhnaah Mizoram hi a hlawhtling zel a, state chhung pawh a ralmuang. Mizoram leh Assam ramri buaina pawh a punlun hmain boruak ṭha tak hnuaiah inbiakna neiin hmalak zel dan tur rel a ni a, ramrite uluk taka ven chhunzawm a ni," a ti.
Aizawla Republic Day lawmnaah hian chief minister Zoramthanga, minister, MLA leh official-te an tel. Parade contingent paruk - 46 Assam Rifle, 90th Bn. BSF, 3rd Bn. MAP, 5th IR Bn., Mizoram Home Guard leh 1st. Bn. MAP Bass Brand an awm a; school contingent erawh Covid-19 avangin a awm lo.