Aizawlah Congenital Heart Disease Screening Camp buatsaih

National Health Mission (NHM) péng pakhat Rashtriya Bal Swasthya Karyakram (RBSK) leh Manipal Hospitals, Bangalore-te chuan a ṭum lina atan nimin khan Aizawl West DEIC, Kulikawnah Congenital Heart Disease Screening Camp an buatsaih. 

He hunah hian RBSK hnuaiah naupang leh tleirawl mi 62-in Manipal Hospital-ah a thlàwna inenkawlna an dawng tawh tih tarlan a ni. RBSK leh Manipal Hospitals hian August 28, 2017 khan nau pian hlim aṭanga lung natna neite enkawlna atan inremna an ziak a; inremna ziah aṭanga tun thlengin nau piang hlim aṭanga tleirawl kum 18 inkar mi 62-te Manipal Hospital-ah a thlàwna enkawl an ni tawh.

RBSK hnuaiah hian nau piang hlim aṭanga kum 18 inkarte hriselna endik hna thawh ṭhin a ni a; natna nei hmuhchhuahte'n enkawlna tluantling an neih theihna tur hmunah rang taka enkawl an nih theih nan tirh ṭhin a ni. Pian tirh aṭanga lung natna neite inenkawlna tura inremna a nih angin, naupang zai ngaite chu Manipal Hospital-ah thawn ṭhin an ni. Damdawi-ina senso leh an thlen man zawng zawng sorkarin a tumsak a, ei leh in leh kal man erawh chu mahni intum tur a ni thung.

Nimina screening camp-ah hian naupang 150 vel an inentir a, zai hnua inenfiahtir tura kal an awm bawk. Inentir zingah naupang lung ná nei 70 chuang hmuhchhuah a ni a, zai ngai mi eng emaw zat an awm bawk. Lung ná nei zinga zai ngaite chu Manipal Hospital-ah thawn an ni ang.

Screening camp hi RBSK/RKSK state nodal officer Dr TC Hmingthangi leh naupang lam doctor Dr RL Nunthara ten an ho a; Manipal Hospital aṭangin cardiologist Dr Lalchand H Bandagi, coordinator Dr Rahul leh echo technician-te an awm bawk.

RBSK hi Mizoramah July 2013 aṭangin kalpui a ni a, nau piang hlim aṭanga tleirawl kum 18 inkarte hriselna endiksak ṭhin a ni. Natna chi hrang 30 a huam a, chu'ng zinga natna 13-ah inenkawlna senso zawng zawng RBSK-in a tumsak thei a ni.