Champhaiah dialysis khawl leh HDU hawng

Health minister Dr R Lalthangliana chuan November 23, Inrinni khan Champhai District Hospital-ah dialysis khawl leh high dependency unit (HDU) a hawng a; kum tharah Health department hnuai­ah hna ruak 734 lâk theih a nih a beisei thu a sawi.

Dr R Lalthangliana chuan, dialysis leh HDU bun a ni ta chu Champhai leh a chhehvel khuate tana thil chhin­chhiahtlak a nih thu sawiin, "ICU kailàwn pawimawh tak HDU leh dialysis-te bunfel kawngah Champhai North leh South bialtu MLA-te ṭhahnem­ngaihna a fakawm. Champhai hi Aizawl aṭanga lam hla tak a nih mai piah lamah ramri dep hmun pawimawh tak a nih angin sorkarin a ngai pawimawhin a thlahthlam lo," a ti.

Sorkar thar din aṭanga hun rei lo te chhungin hmasawnna ruhrel tam tak neih belh a nih thu sawiin Minister chuan, "Health sector hi Chief Minister-in a ngai pawimawh hle. Champhai Hospital hi khum 100 thlenga tihlen a nih theihna tur te, CMO office sak leh Nursing School-te a ṭul leh tahtawl ang zela hmalak a niang," a ti a; kum tharah Health department hnuaiah hna ruak post  734 lak theih a beisei thu leh ZMC tihchangtlung zel tum a nih thu a sawi.

Hawnna inkhawmah hian Champhai North bialtu MLA Dr ZR Thiamsanga, Health & Family Welfare Board vice chairman chu khualzahawm a ni.

Champhai damdawi-ina Dialysis Room-ah hian khawl pahnih a awm a, khawl pakhat Rs. 7,84,000 man niin, Rs. 15, 68,000 sèn a ni a, RO Plant Rs. 16,81,500 sêng a siam a ni bawk. A cheibâwl nan Rs. 7,39,600 hman a ni a, senso zawng zawng chu Rs. 42,38,608 niin, NEDP sum hmanga siam a ni. HDU chu CSS kaltlanga siam Trauma Centre-in a ken tel a ni a, square ft. 731.73-a zau a ni. Hmanraw hrang hrang lei nan Rs. 37,29,286 hman a ni a, khum panga awmin, sum sen zawng zawng chu Rs. 41,21,286 a ni.