SHC session hmasa ber neih a ni 2020-21 SHC budget nuai 2,414.07

Sinlung Hills Council (SHC) sorkar chuan a vawi khat nan November 22, Zirtawpni khan SHC pisaah Sakawrdai Tourist  Lodge conference  hall-ah session an nei. Budget session neih nghal a ni a, kum 2020-21 SHC budget atan cheng nuai 2,414.07 an pawm.

SHC secretary (Aizawl bawrhsap aiawh) Vanlal­hruaizela Khiangte-in Council rorelna leh inrêlbàwl dan tur chi hrang hrang sawiin, SHC chu thil thar a la nih avangin dante pawh a ṭha zawk tura siamṭhat theih a nih thu a sawi a; SHC chhunga hmasawnna ruhrel siamna atana sum hman turte chu state sorkar sum awm dan mila siam a ngaih thu sawiin, "Sorkar laipui dàwr chungchangah state sorkar kaltlanga tih ṭhin a ngai dawn a, Council enkawl dan tur pawh inráwn tawna zir chawp­a hriat zel chi a ni," a ti.

SHC session hi chi hnihin kalpui a ni a, SHC chairman Lalmalsawma Darngawn-in a kaihruai a, member-te an kal kim. SHC session hun hmasa lamah SHC a pian theihna tura theihtawpa beitu zinga thi tawhte hriatrengna leh sûnna hun hman a ni a; session  thawh hnihnaah budget session neih niin, Lalremruata Varte-in kum 2020-21 SHC budget cheng 2,414.07 a pharh a, sawiho hnuah pawm (pass) a ni. SHC chief executive member (CEM) Lalthlamuana Hmar chuan deputy CEM atan Biaknunga, HPC a ruat thar bawk.