State Games atan cheng nuai 250 kawl

November 23, Inrinni khan Commissioner of Taxes conference hall-ah Sports & Youth Services minister Robert Romawia Royte hoin December 9-13, 2019 chhunga Aizawla Mizoram State Games (MSG) neih tur sawiho a ni a; MSG atana sum ruahman cheng nuai 250 chu kutah kawl mek a nih thu an tarlang.

Meeting-ah hian MLA constituency hrang hranga MLA-te leh constituency aiawh te, Organising Committee péng hrang hrang te, sport discipline aiawhte an tel a; MSG hlawhtlinna tura tih tur hrang hrangte an rél. MLA-te'n zawhna leh rawtna an neihte an sawi a ni.

Robert Romawia chuan, Mizo in­fiammite National Games-ah leh Olympic-ahte an tel theih nan ṭan lak a ngaih thu sawiin, "Sports Policy kan neih dawn bakah, hotute hmalaknain MLA fund pawh sport atan direct-a hman theih a ni dawn a, hei hian sport hmasawnna a thlen leh zual hle dawn a ni," a ti.

MSG hi Mizoram state puitling a nih hnua neih leh hmasak ber tur a ni a, Mizoram state a nih hmain ṭum hnih neih a lo ni tawh. Tun ṭumah hian infiammi leh official 10,000 vel an tel tura ngaih a ni.