DMZP-in CAB an duh lo

Delhi Mizo Zirlai Pawl (DMZP) chuan thuchhuah siamin, tun hnaia sorkar laipuiin Parliament-ah Citizenship Amendment Bill (CAB) put luh a tum leh chu an dem thu an tarlang.

DMZP chuan, CAB duh loh lantirna atana kawngzawh huaihawttu zirlai pawl zawng zawngte an thlàwp thu tarlangin, "CAB hian India danpui a palzût a, sakhaw in­thliarna a tichhuak a ni. India hmarchhak mite tan harsatna tam tak a siam dawn bawk. He Bill hi pass a nih chuan, mahni ram ngeiah hnam dangte'n min chîmral thei dawn a, ram leh hnam humhalh thei loin min siam dawn a ni," an ti.

Pawl dangte nen ṭang­rualin ramri vên leh dan loa Mizorama chengte enfiah chungchangah hma an lak ve ṭhin thu tarlangin DMZP chuan, "Union Minister-te kâwm­in, kan rama harsatnate kan thlen ṭhin. Central YMA nen ṭangkawpin kum 2017 khan Delhi-ah Nation-wide Demonstration Against Illegal Immigration in India kan huaihawt tawh a ni," an ti a; CAB do tura thawhpui turin eng lai pawha an inpeih reng thu an tarlang.