Governor conference-ah Mizoram Larsap a tel Tribal-te chawikanna tur rawtna a thlen

November 23, Inrinni khan Governor PS Sreedharan Pillai chu Rashtrapati Bhavan, New Delhi-a Governors Conference-ah a tel a, Mizoram chanchin leh tribal-te harsatna tawh hrang hrangte sawiin, Mizoram din­hmun chawikanna tura rawtnate a thlen. Conference hi President Ram Nath Kovind-a'n a hawng a ni.

Conference of Governors-ah hian session hrang hrang neih a ni a, Parallel Session for Breakaway Group 'A' - Tribal Issues-ah Mi­zoram larsap PS Sreedharan Pillai chuan Mizoram dinhmun a sawi. Governor chuan, Mizoram chu state pakhat chhunga mipui cheng awm zat teha tribal awm tamna ber a nih thu sawiin, "Mizoram mipui zinga 94.4% chu Scheduled Tribe(ST) an ni," a ti. Sorkar laipui leh Mizoram sorkar hmalaknain tribal-te hamṭhatna tur hrang hrang kalpui mek a nih rualin, hmalakna tur tam tak a awm thu a sawi a, "Tribal-te harsatna tawh mek, kawng leh digital connectivity-a harsatnate sutkian a nih theih nan Central-in ruahmanna thar a siam belh a ngai a ni," a ti.

PS Sreedharan Pillai chuan, tribal-te pualin art & film festival buatsaih a pawimawh thu te, tri­bal-te nihna leh nunphung vawnhim leh tarlansak kawngah chak zawka hmalak a ngaih thu te, Mizoramah Mizo, Bru leh Chakma-te pualin kût buatsaih ṭhin a nih thu te, Mizoramah CBSE sikul tam zawk din a ṭul thu te, thingtlanga college awmnaah tribal-te pualin hostel sak a ṭul thu te, sum deh chhuah kawngah Mizoram tan handloom & handicraft a pawimawh thute a sawi.

Mizoram Governor hian President Ram Nath Kovind leh prime minister Narendra Modi te hmaah Mizoram sorkar dinhmun, hmalakna leh hma­chhawpte a sawi bawk a, "Mizoram chu ramri depa awm a nih avangin Asia khawmualpui kawtchhuah pawimawh tak a ni dawn a, Act East Policy chak zawka kalpui a ngai," a ti. Larsap chuan, good gover­nance lamah Mizoramin chhuan­awm taka hma a lak thu te, plastic free city leh PAHOSS chungchang te, Health Outcomes Index sanna ber a nih thu te, Pra­dhan Mantri Sahaj Bijli Har Ghar Yojana hlawhtling taka kalpui thei hmasa ber a nih thu te, Mizorama khaw pathumin Swachh Survekshan award an dawn thu te, faina kawnga hmalak ṭhat vanga national award dawng an awm thu te, Mizoram chu state naupang a nih avangin sorkar laipui ṭanpuina mamawh lo thei lo a nih thute a sawi bawk.