KHAWTHLIR

November 23, Inrinni khan Phulpui Branch KṬP chuan an kohhran hall-ah Aizawl Civil Hospital tan thisen unit 46 an pe a, petute mipa 42 leh hmeichhia pali an ni a; Hunthar Veng Branch KṬP pawhin Synod Hospital tan unit 26 an pe, petute mipa 24 leh hmeichhia pahnih an ni. Tlabunga ṬKP member mipa 43 leh hmeichhia pakuate'n Inrinni khan an khuaah Lunglei Civil Hospital tan thisen unit 52 an pe a; Adventist Youth Federation, Siaha Branch pawhin Siaha District Hospital-ah thisen unit 16 an pe bawk a, petute mipa 11 leh hmeichhia panga an ni.

November 23, Inrinni chawhnu dar 1 vel khan CL Remkimi (6) d/o Biakremmawia, Thenzawl Dinthar Veng chu an inah electric current-in a man a, Thenzawl damdawi-in panpui a nih hnuah a hliam tuar loin chawhnu dar 1:40-ah a thi. Thu dawn danin, CL Remkimi hi an varanda-a a nu puan tahna bula a awm laiin an in banga cable TV hrui (optical fibre node) signal sem darhna aṭanga thîrzai kal a khawih palh a, electric current-in a man a ni.

November 23, Inrinni tlai khan Kolasib thlanga Rengtekawn khuaah chenna in pathum a kâng a, bungrua chuh hman mang lohin a kâng ral. Thu dawn danin, kângmei a chhuak tih hriat a nih veleh khawtlang mipuiin ṭhelh tum mah se, an ṭhelh thei lo. In kângte chu Kolasib DC-in a hmunah a tlawh  nghal a, kângmei tuarte chu Disaster Management & Rehabilitation department aṭangin chhawmdawlna Rs. 1,10,900 ṭheuh pek an nih tur thu a hrilh. Kângmei tuarte chu pawl leh mimalte'n ṭanpuina an pe bawk.

UPC (North East India)-a College Veng, Aizawl kohhran leh Suangpuilawn kohhrante chuan kar kal ta khan an koh­hran kum 50 tlin, golden jubilee an lawm. College Veng UPC-te hian golden jubilee hi November 19, 2019 zan aṭangin an lawm a, November 23 khan a lawmna pui ber hmangin, a lawmna ruai an ṭheh. UPC Suangpuilawn kohhran chuan November 22 zan aṭangin an lawm ṭan a, Inrinni leh nimin Pathianni khan an lawm chhunzawm a ni.