Vaivakawn leh Hunthar Venga lei chê vèn dan tur CM hoin sawiho a ni

Chief minister Zoramthanga hoin November 23, Inrinni khan CM Banglaah Vaivakawn leh Hunthar Venga lei min tur vèn dan tur sawiho a ni a; hmalak zui dan turah ruahmanna hrang hrang an siam.

Meeting-ah hian, Vaivakawn Mual­dung­sei hnuai lui kawr aṭangin checkdam 3-4 vel siam te, Vaivakawn-Hunthar Veng kawngpui kawng bal thawm ṭhat nan gabion wall siam thuai te, Vaivakawn thlânmual kaltlanga kawng thar siam te, lei chê vanga in ṭhiah turte chu Aizawl District Disaster Management Authority kaltlangin sorkarin a ṭul ang ruahmanpui te, National Disaster Respond Authority/Fund hmuh aṭangin chak taka leimin zel tur venna atana hmalakte an rél a ni.

CM Zoramthanga chuan, Vaivakawn-Hunthar Veng kawngpui chu Aizawl khawpui chhuahka kawng pawimawh tak a nih avang leh mipui thlabára awm mekte thlamuang taka an awm thuai theih nan rang taka hmalak a ṭul thu a sawi a, "Sum pawh a remchan dan ang anga ruahman a ni ang," a ti.

Meeting-ah hian Disaster Manage­ment & Rehabilitation (DMR) minister Lalchamliana, bialtu MLA pahnih Lalruatkima (Aizawl West-II) leh C Lalmuanpuia (Aizawl North-III) te pawh an tel. Meeting-a tel MLA pathumte hian lei chêtna hmun hi November 22, 2019 zingah an lo tlawh tawh a ni.

Inrinni vêk khan Vaivakawn thlân­mual aṭanga NH-54 kawngpui pawh thlakna tur kawng siam dan tur chu bialtu MLA Lalruatkima leh PWD hotute leh Vaivakawn khawtlang hruaituten en nghal bawk.