Thangfala hnenah Academy Award

Lalthangfala Sailo hnenah nimin khan Mizo Academy Award 2019  hlan a ni. He award hi nimina Central YMA Hall-a Mizo Academy of Letters (MAL) Annual Meeting-ah khuallian minister of state Lalchhandama Ralte-in a hlan.

MAL Annual Meeting hi an president Prof. Laltluangliana Khiangte-in a kaihruai a; khuallian chuan, MAL chawimawina dawngtu Lalthangfala Sailo chu a lawmpui thu sawiin, thu leh hla lama Zo fate thu ṭha tak tak a hnutchhiah chu ropui a tih thu a sawi a; "MAL hi pawl ṭangkai leh hlu tak, Zo fate thu leh hla lama nasa taka min dâwm kângtu a ni," a ti bawk.

MAL Annual Meeting-ah hian chawhnu lamah 'Mizo ṭawng leh 8th Scheduled' chungchang an sawiho a; MJA kaihhruaiin hruaitu thar an thlang bawk. MAL hian kum thum danah Mizo Academy Award an pe ṭhin a, kuminah chuan MAL president hlui Lalthangfala Sailo hnenah an hlàn a; award hian medal, thuchei leh Rs. 20,000 a keng. Kum 1979-ah sem ṭan a ni a, Rev. Liangkhaia'n a dawng hmasa ber.

Lalthangfala Sailo hi July 16, 1933-ah piangin, thiamna lamah M.A a ni a; Union Christian College, Barapani-ah lecturer (1966-72), St. Edmund's College, Shillong-ah lecturer (1972-73), Champhai College-ah principal (1973-85) leh, NEHU-ah deputy registrar (1985-96) hnate a thawk. Hla 50 chuang phuahin, lemchan 10 chuang a ziak tawh a; chawimawina - Sangeet Natak Akademi Award 2007, Padma Shri 2009, Bharat Adivasi Drama Award 2012 leh Pu Buanga Award 2015-te a dawng tawh a ni.