Blood processing fee tihtawp a nih vangin AVBD-in sorkar chungah lawmthu an sawi

Association for Voluntary Blood Donation (AVBD) chuan nimin khan thuchhuah siamin, Mizoram sorkara Council of Ministers meeting, January 10, Ningania neihin thisen sawngbawlna senso (blood processing fee) lak ṭhin titawp tura thutlukna an siam chu lawmawm an tih thu an tarlang. Hemi rual hian, January leh February thlaa thisenpek uar turin ṭhalaite an ngen.

AVBD chuan, chief mi­nister Zoramthanga kaihhruai Cabinet meeting-in Mizoram sorkarin thisen sawngbawlna senso phuhrûkna tura thisen hmangtute aṭanga blood processing fee a lâk ṭhin titawp tura thutlukna a siam leh hman nghal tura a rêl chu lawmawm an tih tu sawiin, "Blood processing fee tihtawp a nih theihna tura ngaihtuahna sêngtu CM Zoramthanga te, Health & Family Welfare minister Dr R Lalthangliana leh minister zawng zawng chungah thinlung takin lawmthu kan sawi a ni," an ti.

MNF party chuan opposition party an nih laiin, an sorkar hunah blood processing fee tihtawp a nih tur thu an puang tawh ṭhin tih sawiin AVBD chuan, "An thutiama ding nghet a, an sorkar tan aṭanga thla khat pawh a liam hmaa blood processing fee tihtawp a nih theihna atana Cabinet-in thutlukna a siam hi lawmawm kan ti tak meuh a ni," an ti a; processing fee lak tihtawp chuan a thlawna thisen pek (voluntarty blood donation)-ah hmasawnna a thlen ngei an beisei thu an sawi.

AVBD chuan, sorkar damdawi-ina blood bank ṭhenkhatah thawktu an indaih lo tih sawiin, "A bik takin Aizawl Civil Hospital Blood Bank-ah doctor leh thawktu dang an indaih lo hle," an ti a; voluntary blood donation a san leh zual theih nan thawktu dah belh hrâm turin Mizoram sorkar an ngen.

Mizoram sorkar ding tawhtea Health Minister apiangin thisen pek an tuipui tih sawiin AVBD chuan, "A thlawna thisen petu an pun theihna atana AVBD hmalakna reng reng min phûrpui zel ṭhin a, an ṭhahnemngaihna leh an hmalaknaah Health Minister lo ni tawh zawng zawngte chungah lawmthu kan sawi a ni," an ti.

AVBD chuan, kum 2018 Krismas puala a bika thisen pek hun an huaihawta thisen petu zawng zawng chungah lawmthu an sawi a; chutih rualin, thisen mamawh an pun ve zel avangin Aizawl Civil Hospital leh Synod Hospital blood bank-ah thisen dah khawl sa a tlêm hle tih sawiin, thisen pek uart zel turin Mizoram ṭhalaite an sáwm.

AVBD tarlan danin, kum a thar a, YMA leh kohhran ṭhalai pawlte hruaitu insiamrem hun lai leh hmalak dan tur ngaihtuah ṭan hun lai a nih avang leh college hote an chawlh lai a nih avangin January leh February thlaah pawl leh zirna-in hminga thisen pe an tlem ṭhin. Kumah pawh January leh February thlaah pawl anga thisen pek tum an tlem tih sawiin, a thei remchangte chu January leh Februay thlaah blood donation camp buatsaih turin an ngen a ni.