



Hnahsin Kûta nurse uniform lantir danah Mizorama nurse-te an lawm lo
Mizorama nurse pawl hrang hrangte chuan Hnahsin Kût 2026-ah nurse uniform zahlohnaa ngaih theih thil tih a nih thu an tarlang a; tun hnuah chuan nurse hna leh an uniform zahawmna tihniam thei zawnga thil tih a nih tawh loh nan hma la turin Hnahsin Kût Organising Committee an ngen.
Kumin Hnahsin Kûta thil tihnaa nurse uniform hman chungchangah hian Trained Nurse Association of India (TNAI) Mizoram State Branch, Mizoram Government Nursing Service Association (MGNSA) leh Mizoram Government Nursing Teachers' Union (MGNTU) te chuan November 16, 2026 khan Hnahsin Kût Organising Committee hnenah lehkha an thawn a ni.
Pawl pathumte hian Hnahsin Kûta hun hmanah nurse lem chan a ni tih sawiin, "Nursing profession pawimawhziate min hriatsak a, nurse nihna entawn duh hial an awm hi kan lawm hle. Chutihrualin, nurse lem an pho lan danah kan ngaihtuahna leh rilru tithlep deuh laite a awm," an ti.
Nurse hna chu chhun zan zawma mihring damna leh nunna atana hna thawh a nih thu sawiin pawl pathumte chuan, "Nurse uniform zahawmna vawn nun hi kan ngai pawimawh hle. Hnahsin Kûta participant-te'n nurse lem an chan danah nurse uniform zahawmna tihmélhem thei leh a nihna dik tak lantir lohna anga lang a awm hi a ṭha lo kan ti," an ti a; nurse uniform-in nurse nihna leh nursing profession zahawmna a pho chhuah avangin a zahawmna vawn him an tum tlat thu an ziak.
Nurse pawlte chuan, ṭhalaite zingah cosplay-in hmun a luah nasa tawh a, nurse lem chan a nih fo bakah, entertainment industry-ah pawh nurse uniform chu a nihna dik tak kalh zawnga hman a lo ni tawh ṭhin tih an tarlang a, "Nurse uniform nihna dik tak leh a zahawmna vawn nun hi kan ngai pawimawh," an ti.
TNAI, MGNSA leh MGNTU te hian hun lo la kal zel turah Hnahsin Kût hman zel a nih a, nurse lem chan hun a awm leh a nih chuan, nursing profession zahawmna leh nurse uniform nihna dik tak lantir zawnga tih a nih theih nan hma la turin Hnahsin Kût Organising Committee an ngen nghal bawk.