Larsap hnenah Lokayukta report hlan; 2025-26 chhungin thubuai 12 chingfel

Lokayukta chairman Lalmalsawma chuan November 17, Thawhlehni khan Larsap Gen. Dr Vijay Kumar Singh hnenah Mizoram Lokayukta Annual Report 7-na a hlan. Sorkar kum 2025-26 chhung khan Lokayukta-ah hian thubuai 15 ziah luh a ni a, chu'ng zinga 12 chu chinfel a ni.

Lokayukta chairperson Lalmalsawma leh member Lalsanglura leh Joel Joseph Denga te chuan Mizoram Lok­ayukta hmalakna leh hnathawh dan tlangpui Larsap an hrilhfiah. Lokayukta Annual Report 7-na hian April 1, 2025 leh March 31, 2026 inkar a huam a, Mizoram Legislative Assembly ṭhut­khawmah pharh a ni ang.

March 2019 khan Mizoram Lokayukta din a ni a, nimin thleng khan thubuai 101 ziah luh a ni tawh. Thubuai 101 zinga 74 chu preliminary inquiry tih tura ziah luh a ni a, chîk zawka chhui (investigation) turin 37 ziah luh a ni. Chhui zawh tawh Court-a thehluh 17 a awm a, thubuai tihtawp/khar tawh 52 a awm bawk.

Mizoram Lokayukta pisa, MINECO-ah eirûk thubuai hi lehkha pheka ziakin emaw, email Mizoram.lokayukta@mizoram.gov.in ah emaw thehluh theih a ni a, pawisa chawi ngai a awm lo. Mahni nihna tilang duh lote chu an nihna thup sak ṭhin a nih rualin, Lokayukta aṭanga biakpawh theihna tur erawh dah tur a ni.

LOKAYUKTA ANNUAL REPORT 2025-26

☑ Kum 2025-26 chhungin thubuai lut thar 18 a awm.

☑ Preliminary inquiry turin thubuai 15 ziah luh a ni.

☑ Thubuai ziah luh 15 zinga pathum chu ACB chhuitir a ni a, 12 chu Lokayukta Inquiry Wing chhuitir a ni.

☑ Thubuai 15 zinga 12 chinfel/khar a ni.