Rêla rawn lut, Sairang thlen hmaa chhuk ru mi 17-te YMA-in an man

Central YMA hnuaia Vigilance Sub-Committee leh YMA branch palia hruaitute chu November 16, Thawhṭanni tlai leh zan khan rel hmanga hnam dangte hnena inner line permit (ILP) pek chhuah dan an endik a, ILP nei lo hnam dang 17 nangchingin an man.

YMA hnatlangah hian Laipuitlang Branch, Sairang Branch, Sairang Dinthar Branch leh Sihhmui Branch mite an tel a; state páwn aṭanga rél hmanga rawn lut, ILP neih loh vanga Mualkhanga chhuk ru mi 17-te chu nangchingin an man a ni.

Khamrang leh Mualkhang chhehvela eirawngbawlna gas tihchingpen awm ṭhin nia sawi a hmunah an enfiah nghal a; an thâwm thangva hria an awm avangin gas tichingpen ṭhinte an inthiarfihlim hman niin CYMA chuan a tarlang.

CYMA Vigilance Sub-Committee hruaitute chuan, gas tichingpen ṭhinte chu an ûm zui zel dawn a, thâ an thlah dawn loh thu an sawi a; dan loa hnam dang sumdawngte leh bungraw sem ṭhinte pawh dan ang taka an sumdawnnate kalpui tura chahin, dan loa thil tite chu an dim dawn loh thu an sawi bawk.

Hlâwkna ûm vanga hnam dang hming hawhtira sumdawng ṭhin Mizote chu hnam hmangaihna rilru pua sim turin CYMA Vigilance Sub-Committee chuan an ngen bawk a ni.