
Mizoramah ruihhlo tawlh hluarna hmun 129 chhinchhiah a ni tawh
State Anti-Narcotics Task Force (ANTF) chu nimin khan IGP Seju P Kuruvilla kaihhruaiin DGP conference hall-ah an ṭhukhawm a; Mizoramah ruihhlo tawlh hluarna hmun (hotspot) 129 chhinchhiah a nih thu tarlan a ni.
Ṭhutkhawmah hian ANTF ṭhutkhawm hmasaa an rel tawhte bawhzui a nih dan leh hmachhawpte thlirho a ni a; Mizoramah ruihhlo tawlh hluarna hmun 129 chhinchhiah a nih thu tarlan a ni. Ruihhlo tawlh ṭhinte'n an hmalak dan an thlak avangin enforcement lam pawhin fimkhur tak leh uluk lehzuala hmalak a ṭul thu an sawi.
Tarlan danin, Mizoram Police, Excise & Narcotics leh SIB ten state level-ah leh district level-ah Joint Interrogation Team an din tawh a, ṭum 21 joint interrogation an nei tawh. Mizoram Police, Excise & Narcotics leh Social Welfare department ten Anti-Drug Awareness campaign vawi 374 an nei tawh a, zirlai/ṭhalai 34,806-in an chhim.
Damdawi chi khat, Pregabalin chu Mizoram sorkarin notification tichhuaka Schedule H1-ah a telh avangin, zawrh/hralh leh lei chungchangah khuahkhirhna khauh zawk kalpui tura tih a ni.