MPSC Secretary leh Controller of Exam thlâk turin MZP-in Mizoram sorkar phût

MZP chuan nimin khan Aizawl Press Club-ah thuthar thehdarhtute an kâwm a; Mizoram Public Service Commission (MPSC) Secretary leh Controller of Examination thlak ngei tura sorkar an phût thu an sawi. MPSC Chairman erawh chu báng tura nawr ṭul an ti lo thung.

MZP hian sorkar hnathawk tur MPSC-in a laknaa thil dik lo awma mawhphurtu bera an ngaih Secretary leh Controller of Examination-te chu November 20, 2026 ral hmaa thlak turin sorkar an phût a; FCSCA storekeeper lak dan chhui turin tun kar chhungin inquiry committee din tur leh, thla khat chhunga report peihtir turin sorkar an phût bawk.

MZP president C Lalremruata chuan, MPSC-in tun hnaia sorkar hnathawk tur hrang hrang laknaa tih dik loh leh tihsual chungchangah MPSC siamṭhat hnatlang August 6 &7 leh August 10-12, 2026 chhungin an neih tawh thu a sawi a, "MPSC Reform Committee din a ni a, ṭhalai leh hna zawng mekte'n beisei taka kan thlir lai leh, Committee hian rah ṭha a chhuah ngei beiseiin hun tiam chhungin rawtna hrang hrang Committee-ah kan thlen. Committee thutlukna ngaihchan mek a ni," a ti.

MPSC-ah ngaihchan an neih mek laiin Food, Civil Supplies & Consumer Affairs department-a storekeeper tur laknaah MPSC-in rawtna angin mi 15 hnenah October 27, 2026 khan appointment order pek an ni a, ni 5 chhung atan training neih a nih mek laiin written examination result mark-ah tih dik loh (technical error) tam tak a awm thu MZP President chuan a sawi.

C Lalremruata chuan, MPSC chungchanga an phûtte sawiin, "A hlawhtlin theihna atan hma la turin sorkar kan ngen. Kan phûtte hi a hlawhtling lo a nih chuan MZP chuan MPSC siamṭhat kawngah a hma aia nasa zawka hmalak dan tur a ngaihtuah dawn," a ti.

Zawhna chhangin MZP President chuan, MPSC Chairman báng tura nawr ṭul an tih loh thu a sawi a, "Heng tihsuala a mawhphurtu ber MPSC Secretary leh Controller of Examination báng turin kan phût. MPSC Chairman leh member-te chu exam buaipuitu leh mark buaipuitu an ni lo a, anni chu interview kalpuitu an ni. MPSC Chairman hi a bàn chuan a aiawh tur zawn leh chhung nen hna lak a khaihlak dawn," a ti a, hna lak khaihlak ṭha an tih loh vangin a mawhphurtu berte thlak tura an phût thu a sawi a ni.