Fruit beer siam turin mi 12 thlang; Siamtu turte thil pawimawh zirtir an ni

Zu khapna dan, The Mizoram Liquor (Prohibition) Amendment Act, 2025 hnuaia tualchhunga thar thei hmanga beer (fruit beer) siam turin diltu zinga mi 12 thlan an ni a; chung mite tan chuan Excise & Narcotics department (END) chuan nimin khan training an buatsaih.

'Training on Sensiti-sation of Rules & Regulations' hi Excise & Narcotics commis-sionerate conference hall-ah Mizoram Bána Kaih (Handholding) Scheme leh Selection & Regulatory Committee for Brewery & Winery ten an buaisaih a ni.

Inzirtirna inkhawm hi END joint commissioner Peter Zohmingthanga'n a kaihruai a; fruit beer siam turte chu mithiamte'n FSSAI inkaihhruaina hnuaia thianghlim taka sâwngbâwl dan tur te, beer an siamte mawihnái taka tuam dan tur te, sum leh pai enkawl dan te, MLPA Act 2025 hnuaia dan zawm tur te, lchhiah chawi tur chungchang te, fruit beer chungchanga kaihhruaina (Standard Operating Procedure) an hrilhfiah.

END tarlan danin, MLPA Act, 2025 hnuaiah Mizorama thei leh thlai thar hmangin fruit beer siam phal a ni a; fruit beer siam diltu mi eng emaw zat zingah mi 12 thlan niin, manufacturing licence pek tawh an ni. Licence pek mai theih an la awm nual bawk.

Fruit beer siam hi Mizorama thei leh thlai thartute dâwm kanna tura Mizoram sorkarin a ruahman a ni a, Mizorama thar chauh hmanga siam phal a ni. Fruit beer siamtute'n an siam chhuahte chu a zuar tur bika thlan distributor-te hnenah pek chhuah a ni ang.

END hotute chuan, fruit beer chu siam chhuaktu (manufacturer)-te'n mipui hnena an hralh phal a ni dawn lo tih sawiin, "Dan hnuaiah local fruit beer an siam ang a, distributor turte peih a nih veleh zawrh chhuah a ni ang. Licence nei loa zuarte chu man theih an ni dawn," an ti.

Fruit beer siam theina thlai/thei tarlante chu - Mizorama thar - sawhthing, balhla, chawngthei (dragon fruit), sapthei, lakhuihthei, sunhlu, káwlthei, theiheráwt, fú, làmkhuang, dawnfawh, hmazil te a ni.