Mikhual dawngsawng turin mipui kan inhmakhua a, ṭanrual a ṭul - Tourism Minister

Tourism minister Lalnghinglova Hmar chuan, Krismas lo thleng turah khualzin tam tak an rawn luh rin a nih thu sawiin, mikhual dawngsawng turin mipui an inhmakhua a, ṭanrual a ṭul thu a sawi.

Mizoram Pollution Control Board hnuaia EIACP Hub chuan Green Skill Development Training Programme (GSDP) hmangin Nature Conservator cum Ecotourism Guide GSDP Certificate Course an buatsaih a; nimin khan Aijal Club-ah kharna inkhawm an buatsaih a, Tourism Minister-in hmanpuiin, training zo mi 20 hnenah certificate a hlan.

Tourism Minister chuan, khualzinte thlitfim a ngaih hun an thlen a rinawm thu sawiin, "Tunah chuan Mizoram hi hnam dangin min hriat ṭan chauh avangin mikhual zawng zawng tana kan inhawn a ṭul. Krismas lo thleng turah pawh khualzin ṭhahnem takin Mizoram an tlawh a beiseiawm a, mikhual dawnsawn kawngah mipui kan inhmakhua a, kan ṭanrual a ṭul," a ti.

Tourism-in culture, adventure leh nature a ngaih pawimawh thu sawiin Minister chuan, "Ramngaw leh nungcha tichereu lo zawnga tourism kalpui a ṭul a, ecotourism guide-te an pawimawh dawn a ni," a ti a; khawtlang mipuite inunauna hmanga khualzin hip (community-based tourism) an kalpui ṭan thu a sawi.

Lalnghinglova Hmar chuan, tourism chu Mizoram pum huap a nih avangin Tourism department leh department dangte'n thawhhona ṭha an neih a ṭul thu a sawi a, "Mizoramah rêl kawng leh social media avangin tourism a ṭhang nasa a, khualzinte aṭang sum tam tak lo lutin, pawisa che vel chuan Mizoram economy a siam ṭha dawn a ni," a ti.

Tarlan danin, Nature Conservator cum Ecotourism Guide GSDP Certificate Course hi hlawm li - theory, practical, employability skill leh on-tob training-ah te ṭhen a ni a; ṭraining-a telte chu leilung leh a chhunga awmte humhalh chunga chhawr tlak an nih theih nan leh eizawnna ṭha an neih theih dan tur zirtir an ni.

GSDP Certificate Course hi Mizoram EIACP Hub chuan kum 2018 khan a kalpui ṭan a, tun thlengin vawi riat an buatsaih tawh. Training-a tel tawh zat chu mi 145 an ni a, chu'ng zinga mi 20 chuan sorkar hnuaiah hna an hmu a, mi 21-in mahniin eizawnna bul an tan bawk.