Khawpui tâwt tihziaawm nan public transport rintlak neih a pawimawh - CM

Chief minister Lalduhoma kaihhruaiin nimin khan CM conference hall-ah externally aided project (EAP) hnuaia Aizawl Sustainable Urban Transport Project (ASUTP) kalpui dan tur sawiho a ni. CM chuan, khawpui tâwt tihziaawm nan public transport rintlak neih a pawimawh thu a sawi.

Ṭhutkhawmah hian regional terminal - bus, maxicab leh truck dinna sak turah thlai thar dahṭhatna (cold chain storage) leh a hlawma hralh chhuahna hmun siam belh dan tur sawiho a ni a; Aizawl khawpui chhung kawng leh Aizawl Western By-pass Road laih mek chu traffic tâwt tihziaawm nan hmun eng emaw zatah thlun zawm a nih theih dan turte sawi a ni bawk.

Lalduhoma chuan, public transport rintlak neih a pawimawh thu sawiin, "Mipui tam zawkin uar zawka public transport an hman theih nan fai leh thianghlim, felfai taka enkawl, ṭha taka hunbi vawng chunga tlan theih a pawimawh. UDPA department hmalakna hnuaiah khawpui traffic tihziaawmna tur bakah, mipui hriselna tihhmasawn nan kea kalna tur ruahmanna te, traffic junction thawm ṭhatna tur leh, bus, truck leh maxicab dinna tur hmunhma ruahmanna ASUTP buatsaih a ni hi a lawmawm," a ti.

Aizawl khawpui pawn lama kawngpui pawi-mawhte chu mihring chennain a zìm tâwt leh hmaa mumal taka ruahman lawk a pawimawh thu Chief Minister chuan a sawi bawk.

Meeting-ah hian UDPA minister K Sapdanga, adviser to CM TBC Lalvenchhunga, UDPA secretary V Lalsangliana, Planning secretary David Lalthantluanga, Finance secretary Ramchuana, Aizawl bawrhsap Lalhriatpuia, Transport director R Lalrammawia, UDPA director Jacob Lalawmpuia, Traffic SP C Vanlalvena bakah, PWD, Power & Electricity, Central YMA, Aizawl City Bus Owner’s Association, Mizoram Taxi Association leh Mizoram Maxi Cab Owner’s Association hruaitute an tel a ni.

ASUTP NIHNA TLANGPUI

* Asian Development Bank kaltlanga hmalakna tur a ni a, financial year 2027-28 aṭanga 2030-31 chhungin Phase-I kalpui tur a ni.

* Cheng vbc 414.04 hmangin public transport thawm ṭhatna tur, depot terminal leh electric vehicle charging station sak.

* Kulikawn-Bawngkawn, Temple Square-Vaivakawn leh Bawngkawn-Ramhlun thawm ṭhat.

* Regional terminal - bus leh maxi cab dinna tur Muallungthu, Sihhmui leh Bung Bangla-ah te sak.

* Sihhmui leh Bung Bangla-ah truck terminal sak.