KHAWTHLIR

Certificate hlan

LESDE director Pinky Zosangpuii chuan nimin khan Mizoram Building and Other Construction Workers Welfare Board - Skill Development Course (Health Sector) hnuaia Mission Foundation Movement-in General Duty Assistant (GDA) Geriatric Caregiver Course an buatsaiha zirzo mi 53 hnenah certificate a hlan. Tun ṭuma zir chhuakte hi mimal damdawi-in leh clinic hrang hrang, Bengaluru leh Mumbai-a nursing home-te bakah, Japan leh Singapore-ah te caregiver hna thawk turte an ni.

Lui humhalh zirtir

Champhai District Fisheries Development Officer pisa chuan nimin khan Hnahlan High School-ah lui humhalh leh sangha fuan laia man loh pawimawhzia inzirtirna an buatsaih. Inkhawm hi Hnahlan H/S headmaster Lianhmingthanga Hnamte-in a kaihruai a, Champhai DFDO Lalremsangpuii'n thil pawimawhte a sawifiah a ni.

DIET lehkhabu

Aizawl district bawrhsap Lalhriatpuia chuan nimin khan District Institute of Education and Training (DIET) Aizawl Auditorium-ah ‘Employment Opprotunities, Career Outcomes and Job Satisfasction of D.El.Ed Graduates from DIET Aizawl’ tih lehkhabu a tlangzarh. Lehkhabu hi DIET Aizawl Research team buatsaih a ni.

MLA-in a bialah public interview a buatsaih

Aizawl North-III bialtu MLA K Sapdanga, minister chuan nimin khan a biala chhung Hunthar Veng Local Council House-ah mipuite'n amah an hmuh theihna hun, 'Meet on the Public Programme' a buatsaih. He hunah hian veng chhung mi a duh apiang tan dawr theihna hun siami niin, mimal leh pawl eng emaw zatin an hmu a; mimal leh veng chhung hmasawnna atana pawimawhte an thlen a ni.