Kan la dingchhuak thei lo a nih chuan tihngaihna awm tawh loah ka ngai - CM
Chief minister Lalduhoma chuan, ZPM sorkar hnuaiah kutkawih eizawina kalpuitute (entreprenuer) tan dinchhuah theihna kawng a inhawn mek thu sawiin, chuti chunga an dingchhuak lo a nih chuan tihngaihna a awm tawh loa a ngaih thu a sawi.
CM Lalduhoma hian nimin khan Woodland Hill, Aizawlah Mizoram Entrepreneurs' Chamber buatsaih Youth Entrepreneurs Summit (YES) 2026 a hmanpui a; kum 2047 thlirin kawng tinrêngah hma an lak thu sawiin, "Kut hnathawktute tan thlai thar eng emaw zatah support price kan pe a, animal insurance leh crop insurance kan kalpui a, Bâna Kaih scheme-ah loan rûl ṭhate loan pung (interest) kan rulhsak a, a chesualte rehabilitate-na tur package kan siam a, quarantee fee thlengin kan rulhsak leh vek a ni," a ti.
Mizoram sorkar hmalakna chu entreprenuer dinchhuah duh tan chuan dinchhuah theihna a nih thu sawiin Lalduhoma chuan, "Hetiang hnuaiah pawh kan la dingchhuak thei lo a nih chuan tihngaihna kan awm tawh loah ka ngai. Hetiang ang awlsamna hi khawvel hmun dangah emaw, India ramah emaw han zawng teh u, in hmu kher lo ang," a ti a; sorkarin remchang a siam chu ṭhalaite'n an hlawhtlinpui ngei a ngaih thu a sawi.
Chief Minister chuan, ṭhalaite tan theihtawp an chhuah thu sawiin, "Sum leh pai nei lo leh pachhe tak chungin kan ṭhalaite kan hmangaih avangin theihtawp kan chhuah a, kan neih ang ang an tan kan sengso. CM Special Package hmangin eizawnna tênaua bul ṭan duh leh an neih sa tilian duhte tan kawng kan hawng a, tlêma a lian tham deuha hma la duhte tan loan component kan siam," a ti.
Lalduhoma chuan, tun hmaa loan lâk dawna dahkham (guarantor) neih a ngaih lai chuan Mizoram chu loan rûl ṭha loh vangin a hmingchhia nia sawiin, "Tunah chuan guarantor-ah sorkar a ṭang ta a, kan rulh ṭhat loh pawhin sorkarin kan loan kha min rulhsak mai dawn a ni. Loan rûl ṭha lo pakhatmah kan la nei lo a, hei hi chu thlarau lam thil a ni telin ka hria. Mihring kan lo dik chho ta a, dikna a lo awm ta a, loan rulh loh mai duhna thinlung nei kan awm lo," a ti a, ropui a tih thu sawi.
CHIEF MINISTER THUSAWI
✓ Thil thar ngaihtuah chhuah (innovation) lamah ṭan kan lak a ṭul.
✓ MSME lamah pawh harh tharna a thleng mek a, ṭhalai tam takte'n kan agriculture product-te hmangin food processing unit an din mek.
✓ Kan thei thar aṭanga fruit beer siam chhuak tur mi eng emaw zat chu permit kan pe.
✓ Entrepreneur tam zawk kan neih zel theih nana sorkarin hma a laknate hi zir chiang u la, chhawr ṭangkaitu nih tum rawh u.
✓ Kan rama thil siamte hi mipuiin kan ngaihhlut thiam a ṭul a, mahni ram siam ngei hi lei nachang i hria ang u.
✓ Sorkarin The Mizoram Preferential Store Purchase Rule a siamṭha a, kan kutchhuakte hi a theih ang anga hman ṭangkai zel kan tum. State páwn lama thehdarh pawh kan duh a, Delhi-ah August thla khan Made by Mizo Dawr (Kiosk) kan hawng.
✓ Awlsam zawka kan entrepreneur-te'n pawisa pûk tur an hmuh theih nan kan puala bank neih ṭha kan ti a; a zir chiangtu tur committee kan din tawh a, a taka chantir thuai kan tum dawn.
✓ Kan zavai hian Team Mizoram kan ni a, Mizoram hmasawnna tura thawkho vek, mawhphurhna nei vek kan ni.