LMC Vice Chairman a bâng

Lunglei Municipal Council (LMC) vice chairman K Lalrinawma chuan LMC vice chairman a nihna aṭanga bânna nimin tlai dar 3 khan LMC chairman Lalzuithanga hnenah a thehlut.

K Lalrinawma chuan, ZPM party-a an hotute nen thil an sawiho hnuah tun dinhmun an thleng tih tarlangin, "Kan party chuan chanvo insemzâi hi kan thupui a ni," a ti a; LMC vice chairman a nih chhunga Chairman leh thawktu dangte nen thawhhona ṭha tak an neih avangin lawmawm a tih thu leh, a aiawhtu tur amah aia ṭha zawk an awm thu a sawi.

LMC vice chairman aṭanga a báng chu boruak ṭha tak hnuaia ti an nih thu leh bialtu MLA leh party hruaitute chungah a lawm thu K Lalrinawma chuan a sawi a; Vice Chairman a nih chhungin thuneihna hman sual emaw, sum chhehrelh emaw a neih loh avang leh, a phâk tawkah tihsual lian lutuk a neih loh avangin a lawm thu a tarlang bawk.

ZPM Southern Hqrs president Lalramliana, MLA chuan, tun hnaiah party an insingsa a, hotute'n party-a an insawh ngheh phawt an ngai pawimawh hmasa tih sawiin, "Pu K Lalrinawma pawh party-ah mawhphurhna pawimawh tak nei se an duh a, amah pawhin ṭhahnemngai zawka party-a thawh a duh avangin hetiang hi a ti ta a, kan hotute duh dan pawh a ni," a ti.